Il mio sito

Pina Licciardello

Il sito in tutte le lingue

Video in primo piano 

 

DUCI TERRA MIA!

CATANIA FOREVER

CATANIA COM'ERA

SALUTI DA CATANIA

GIOCHI PEDUTI

CONTATTI

Nota: I campi con l'asterisco sono richiesti

I miti classici in dialetto siculo

di Pippo Nasca

Ecco l'e-mail che mi ha inviato l'autore:

 

"Non so se posso abusare dell'ospitalità nel tuo sito. Ti sottopongo un gruppo di poesie in dialetto che riguardano i miti. Puoi farne l'uso che vuoi. Sono anche inedite.
Premessa:

"L'idea di scrivere in siculo dialetto i miti classici del mondo greco-romano, mi nacque tanti anni fa, esattamente quand'ero studente del Liceo, leggendo le opere del poeta latino Ovidio Nasone, dove si parlava delle Metamorfosi. Sarà stato forse che il nome Nasone assomigliava al mio Nasca, sarà stato l'amore per il latino, sarà stato l'avere scoperto che la Sicilia era stata scelta dagli antichi Greci come culla delle leggende mitologiche od altro non lo so. Sta di fatto che nel tempo, di tanto in tanto ho scritto un bel numero di poesie tutte in endecasillabi sciolti, attingendo dal mondo mitologico  di Ovidio. Si, ai miei tempi si traduceva pure Ovidio al Liceo Scientifico. Oggi non so!" Pippo Nasca

 

Io ringrazio l'autore e come sempre sono ben lieta di pubblicare i suoi lavori

 

************

 

 

 

 

Lu mitu di menta

 

 

C'era na vota nta l'antica Grecia

 

na picciuttedda sapurita e duci

 

ca si chiamava Menta ed era cara

 

a lu divinu regi di l'infernu.

 

Quannu stinnicchiu lu pungeva forti,

 

stancu di stari sutta terra misu,

 

stu Diu lassava lu 'nfirnali tronu

 

e la circava supra di la terra.

 

La picciuttedda senza chiù ritegnu

 

accuminciò ad aviri la pritisa

 

di divintari santa di l'Olimpu,

 

accussì, comu 'ntisi diri, fici

 

Baccu divinu cu l'umana Arianna.

 

Ma Menta non pisò boni li cosi,

 

ca lu Diu di l'infernu non suffreva

 

di santi imbriacaturi comu a Baccu

 

e ca li Dei sunu certi voti farsi.

 

Tant'é ca ragiunannu a tavulinu,

 

iddu di Menta si scurdavu quannu

 

di Ceriri la figghia si fuivu.

 

Spirava Menta, ca lu rattu vitti,

 

ca Ceriri la figghia ripigghiassi

 

e libiru lassassi re Plutoni

 

di scapulu ristari comu sempri.

 

Ma comu già sapiti, di lu 'nfernu

 

Proserpina rigina divintavu!

 

Scansatini signuri, di la vucca

 

a Menta chi ci nesci allura contru

 

la rivali, la matri e lu re Plutu!

 

La Fama tostu, comu sempri faci,

 

a Ceriri ci cunta pi tri voti

 

li maliframi di la scunsulata.

 

La santa diva di la terra arraggia,

 

lassa l'Olimpu e torva l'occhi gira

 

finu a quannu di Menta si n'adduna,

 

ca biata si sciacquava nta lu ciumi.

 

Pi li capiddi afferra la mischina,

 

la tira a ripa e poi l'azzicca in terra

 

comu na pianta di jardinu e dici:

 

"Facci di cazzu, Menta maliditta,

 

lu 'nfernu ca vulevi ora ti dugnu,

 

ma senza lu sdilliziu ca circavi!

 

Accussì impari a rispittari sempri

 

cu' ti sta supra pi divinitati."

 

Virdi diventa d'impruvvisu Menta,

 

lu so corpu lignusu e nicu e fogghia

 

la lingua, ca lu ventu annaca

 

senza chiù vuci, senza chiù clamuri.

 

Erba scunchiusa tra scunchiusi erbi

 

Menta diventa senza chiù ammustrari

 

la so biddizza ca 'mbriacavu a Plutu.

 

La Fama cunta la svintura amara

 

di sta carusa e puru nta lu 'nfernu

 

a Plutu arriva la nutizia fera.

 

Lu Diu cummossu pi la tristi sorti

 

di la picciotta ca la ricurdava

 

duci e spizzenti chiù di la muggheri,

 

a Giovi s'apprisenta e dici tostu:

 

"Puru si patri si di me muggheri

 

a Tia nun manca sensu di giustizia.

 

Finu ad ora nun mi risulta affattu

 

ca li fimmini amati da li Dei

 

sunu, dopu, sfuttuti e scurnacchiati.

 

Di Leda tu facisti na rigina

 

dopu ca comu cignu l'acchiappasti;

 

nun parramu d'Europa , ca cuntinenti

 

divintavu pi tia ca toru fusti.

 

Tu certamenti riplicari poi ,

 

ca tu si Giovi ed iu sulu Plutoni.

 

(Non dugnu tortu a chista viritati!)

 

Ma Baccu allura, ca d'Arianna stidda

 

ni fici di lu firmamentu, dimmi,

 

quali pritisi accampa chiù di mia,

 

ca Menta mia ridotta ad erba giaci,

 

mentri iddu la ripassa quannu voli?

 

A Tia ti pari giustu stu discursu?"

 

Giovi lu mussu storci in viritati

 

pirchì disfari 'un voli 'n-soccu fici

 

la madri addulurata e mancu voli

 

scuntentu rimannari re Plutoni.

 

Pensa e ripensa tanticchedda e poi

 

apri la vucca e decretannu dici:

 

"Menta piccavu ed erba resta certu,

 

ma pi l'amuri ca purtavu a Tia,

 

divinu Plutu, eterna ora la rennu

 

e sapuri ci dugnu chiù spizzenti,

 

comu quannu carusa a Tia li sensi

 

cattigghiava nta l'amurusu amplessu.

 

Ognunu ca la tasta d'accussì

 

riprova la ducizza stuzzicanti

 

di l'amuri ca Tu Plutu pruvasti."

 

Chista é la storia ca di Menta parra

 

e siddu nun é vera certamenti,

 

bedda mi pari e china di puisia.

 

 

*********** 

 

 

 

 

        Li corna di Vulcanu

 

  

D'antichi corna cilibrati fasti

 

lu munnu é chimu pi lu gran parrari

 

ca ni ficiru pueti e truvaturi.

 

Sintitivi sta storia in argumentu

 

ca lu sapuri ci havi di divinu.

 

La madreterna di l'Olimpu, 'n-jornu,

 

dici la storia ca si fici 'n-figghiu

 

sula sulidda senza lu cunsensu

 

e mancu l'opra di lu Patri Giovi

 

o d'autru, ca murtali fussi o divu.

 

Siccomu pari ca 'un ci vinni bonu,

 

la dia lu rimazzavu di l'olimpu.

 

Tummavu in terra lu nannatu tostu

 

rumpennusi na jamma nta l'impattu.

 

Lu chiantu scunsulatu lu sarvavu,

 

ca la divina Teti ed Eurinomi

 

si 'l'addivaru comu 'n-figghiu soi.

 

Criscivu d'accussì lu Diu Vulcanu

 

zoppu e deformi, ma nta l'arti dottu

 

di travagghiari ferru, ramu ed oru;

 

tantu ca lu firraru addivintavu

 

d'Olimpu e, comu cunta Omeru, a tutti

 

l'opra pristava so' cu gran piaciri.

 

All'officina 'n-jornu s'apprisenta

 

la Dia Giunoni ca l'ordini ci detti

 

di farici nu tronu beddu novu.

 

Vulcanu metti manu a lu marteddu,

 

la forgia adduma e in tempu nenti porta

 

a la divina matri di li dei,

 

l'opra chiummuta ricca di ricami

 

e fregi, ma d'inganni puru china.

 

Comu s'assetta infatti nta lu tronu

 

resta impicata e ferma la mischina,

 

ca nu cungegnu ammucciatizzu fici

 

scattari attornu a lu so corpu milli

 

catini di robustu e duru azzaru.

 

Li schigghi di Giunoni nta l'Olimpu

 

s'intisuru furenti e senza effettu

 

Giovi accurri pi libirarla prestu,

 

ca l'officina di Vulcanu vinni

 

da lu messu truvata bedda chiusa.

 

E quannu finalmenti lu truvò

 

Mercuriu, mentri si scialava all'aria

 

frisca, beddu giummutu dissi chiddu:

 

"Dicci a dda gran buttana di me matri

 

ca stassi ferma ddocu pi l'eternu

 

ca d'accussì nun rischia di cascari

 

in terra da l'Olimpu comu a mia,

 

ca zoppu sugnu e malufattu puru."

 

Lu sommu Giovi, ca di fari paci

 

tra li Divi s'accolla lu duviri,

 

chiama Vulcanu e l'ordini ci duna

 

di strogghiri Giunoni.... pi piaciri!

 

"Nun ni facemu nenti - dissi allura

 

iddu - ca ju pi chissa zoppu sugnu

 

ributtanti e privu di muggheri

 

senza spiranza d'accumudamentu."

 

Giovi, ca leggi nta lu ciriveddu,

 

capivu a tappu lu prublema veru

 

c'attanagghiava lu sciancatu diu.

 

Nun era la minnitta ma lu pilu

 

ca Vulcanu circava. Allura calmu

 

e senza cumplimenti dissi:"Senti,

 

libirannu a Giunoni tu mi fai

 

cuntentu, a mia ca sugnu Giovi patri

 

ed ju decretu ca a tia pi muggheri

 

ti sia cuncessa chidda ca tu voi."

 

"Veniri vogghiu - dissi a tappu Efestu -

 

ch'é la chiù bedda di l'Olimpu! Sulu

 

accussì di lu tortu anticu sugnu

 

in parti ripagatu e soddisfattu."

 

Giovi accunsenti ed accussì la paci

 

torna a rignari nta l'olimpu infini

 

ca libira Giunoni si ni vola

 

e nun ci pari veru di scappari.

 

Veniri, ca nun era virginedda,

 

filici fu d'aviri lu cumpagnu:

 

pì quantu lariu e zoppu fussi, sempri

 

cuperchiu bonu  é lu maritu appressu!

 

Cuntentu chiù di tutti fu Vulcanu

 

d'aviri ddu gran pezzu di muggheri

 

ca l'occhi ci lincheva di piaciri

 

lu sulu avirla accantu nta lu lettu.

 

Ma non sempri la paci dura eterna,

 

ca Marti s'invaghivu di la Dea.

 

Iddu li scusi accampa chiù banali

 

pi jri a casa di Vulcanu: 'n-jornu

 

l'elmettu ci havi ruttu, 'n-autra vota

 

la scarpa e 'n-autra ancora la curazza.

 

Mentri Vulcanu abbersa cu li stigghi,

 

Marti la corti a Veniri ci faci

 

e senza tanti cumplimenti corna

 

ci metti tostu a lu spusinu friscu

 

ca Veniri muddisa lu cunsenti.

 

La Fama 'mpacciddera comu sempri

 

a Vulcanu ci cunta di la tresca.

 

Lu diu s'incazza, ma nun dici nenti.

 

Anzi diventa chiù amurusu e dici

 

a la muggheri ca lu jornu tali

 

supra la terra ha stari pi tri jorna

 

e ca pirtantu fussi cumprinsiva

 

ca nu travagghiu aveva troppu urgenti.

 

Ma prima di partiri lu firraru,

 

na riti ammuccia supra di lu lettu

 

capaci di scattari all'impruvvisu

 

comu rattera ca li surci acchiappa;

 

poi la muggheri vasa cu' passioni,

 

s'arraccumanna ca chiudissi boni

 

finestri e porti contru li latruni

 

e zuppicannu s'alluntana tostu.

 

Finestri e porti chiusi la divina,

 

sulu dopu ca dintra  Marti vinni!

 

"Pensa, tri jorni avemu di passioni,

 

- dissi la dia, sfilannusi la vesti -

 

tri jorna di gudiri in santa paci

 

senza sciancatu attornu, martiddati

 

e fetu di carbuni nta li stanzi.

 

Spogghiati prestu e nun pirdemu tempu!"

 

Marti si leva la curazza e l'elmu

 

e senza mancu diri na parola

 

Veniri acchiappa comu un saracinu,

 

la sbatti nta lu lettu e poi di supra

 

ci tumma a pisu mortu e ddocu, puff!,

 

la riti scatta supra tutti e dui!

 

Vulcanu ca turnavu all'impruvvisu

 

li lassavu ammagghiati comu pisci

 

e senza dari ascutu a la muggheri

 

ca lacrimi virsava di pirdunu

 

ed a Marti ca frati lu chiamava,

 

la porta insirragghiavu di la casa,

 

chiamavu a tutti li divinitati

 

e lu bannu jttavu di li corna

 

ca Veniri ci fici frischi, frischi,

 

'nvitannu  tutti a cunstatari quantu

 

buttana fussi Veniri divina.

 

Pinsava giustamenti lu mischinu

 

ca di virgogna cummigghiatu avissi

 

eternamenti li dui tradituri

 

ed iddu avirni santa cumprensioni.

 

Ma sintiti chi ci successi inveci!

 

Tuttu lu Diami fimminili, intantu,

 

saputu lu mutivu di l'invitu,

 

tanticchia pi virgogna ma chiù assai

 

pirchì d'accordu a Veniri s'intisi,

 

non vinni ad ammirari lu purtentu.

 

Lu rimanenti Olimpu vinni a frotti.

 

"Virgogna! - dissi Giovi - cu' ssu cosu

 

ancora tisu nun t'affrunti alloccu

 

ca bardasciannu vai a destra e manca?

 

Ch'é veramenti bona, comu vidu

 

cunstatu e decretannu affirmu, Veniri

 

lu sacciu, ma tu si lubricu e zozzu!

 

E tu figghiuzza in chistu chi ci trovi?"

 

Accussì dici Giovi e cu' li manu

 

la tasta tutta para e l'occhiu scaccia.

 

Ad unu ad unu tutti li santuni,

 

di Veniri ludannu li fattizzi,

 

si fannu in quattru pi tuccarla tutta.

 

Infini Giovi a Vulcanu cumanna

 

di rumpiri la riti e di tiniri

 

fora lu tradituri Marti, mentri

 

lu cunsessu divinu, a porti chiusi,

 

giudiziu dassi giustu di lu fattu.

 

Comu la porta si chiudivu arreri

 

a li spaddi di Marti e di Vulcanu,

 

matruzza bedda chi successi dintra!

 

Nun sacciu s'atu vistu mai li cani

 

puntari accalurati nta li strati

 

na fimmina ch'é pronta a la bisogna!

 

Idda s'annaca, gira, scappa e torna

 

mentri d'attornu currunu l'armali.

 

Accussì ddocu Giovi e l'autri Dei!

 

"Mi tocca a mia ca sugnu Giovi patri!"

 

"Mi tocca a mia ca fui chiamatu prima!"

 

"Ju sugnu chiù picciottu!" "Ju chiù granni!"....

 

Mentri li vuci in celu vannu, qualche

 

cazzottu scappa nta li facci santi.

 

S'incazza Giovi infini e jetta 'n-tronu.

 

Ni senti lu rumuri arreri a porta

 

lu Diu Vulcanu ed é cuntentu, certu

 

ca la giustizia infini ci havi corsu!

 

"Havi a finiri sta casciara - dici -

 

Cca tutti santi semu e pari quannu

 

di pilu si discurri! Ondi per cui

 

li polizi facemu e turnu avemu!"

 

L'elmu di Marti, dda lassatu in terra,

 

li carti cu li nomi arricugghivu

 

e d'accussì finivu la cuntisa,

 

ca l'ordini fu fattu nta lu lettu.

 

Infini Giovi dissi: " la faretta

 

Veniri rimettiti e  muta statti

 

pi 'n-soccu dicu a to maritu e Marti.

 

e tu, Mercuriu, grapi lu purtuni

 

e l'ordini di trasiri ci duni

 

a ddi curnuti ca di fora stannu."

 

Trasi Vulcanu e Marti e Giovi parra:

 

" L'altu cunsessu di l'olimpu tuttu,

 

ca cca chiamatu vinni da Vulcanu

 

pi l'offisa ca Marti ci arrecavu

 

cunnanna l'attu oscenu cunsumatu

 

contru la liggi maritali in attu.

 

Marti luntanu di sta casa allura

 

ristari devi pi l'eternitati.

 

Di guerri s'occupassi e non d'amuri!

 

Vidennu ch'é muddisa la muggheri,

 

ondi evitari li marziali corna,

 

decretu ca li cca presenti dei,

 

quannu Vulcanu pi travagghiu nesci,

 

li sintinelli sunu di l'onuri

 

e di lu lettu di lu Diu sciancatu,

 

ondi, lu turnu rispittannu certu,

 

prisenti sunu sempri nta l'assenza."

 

Fu d'accussì cuntentu e chiù curnutu

 

lu poviru Vulcanu nta l'olimpu,

 

ca di figghi accucchiavu na caterva

 

di Veniri in caluri e di li Dei!

 

 

**********

 

 

 

     La nascita di Veniri

  

 

Quannu tagghiata a trincu cu' na fauci

 

da lu putenti figghiu di lu celu

 

tummavu nta lu mari la gran cedda

 

d'Uranu spudistatu, la scumazza

 

di l'unni la cuprivu d'amurusu

 

ciatu e mentri mostri turmintusi

 

lu sangu persu ginirava in terra,

 

d'idda l'aspettu stracanciavu tuttu.

 

Mentri natava nta lu mari Egeu

 

circannu lidi ameni unni sbarcari,

 

sutta la negghia di scumazza janca

 

fimmina divintavu di biddizza

 

funna mai vista prima nta la terra.

 

Sulu vistuta di la schiuma infini

 

nta l'isula di Cipru si firmavu

 

ed unni pedi scarpisannu jeva

 

ciuri nasceva priffumatu e beddu.

 

L'Uri e li Grazi' la visteru a gara

 

di milli cosi tutti boni e rari

 

c'addumanu li sensi e lu disiu.

 

Cedda divina pi la cedda nata,

 

Veniri prestu cunquistò lu munnu,

 

ca dunni guerra sempri c'era prima

 

l'amuri si truvava a cuntrastari.

 

Sta storia antica cilibrari voli

 

lu mitu di la cedda ch'é.... divina!

 

 

**********

 

 

 

 

 

Davanti a la funtana di la stazioni

 

  

C'era na vota na picciotta schetta

 

de' parti di Enna, la liggenda voli,

 

di na Dea figghia sula prediletta

 

ca nta 'nu pratu arricuggheva violi.

 

 

 

Appari, quannu menu si l'aspetta,

 

l'orribili Plutoni tra cannoli

 

di fumu inturciddatu e l'aria infetta

 

d'isurfaratu fetu e, li paroli

 

 

 

chiù tristi farfagghiannu, l'assicuta

 

e subitu nto 'nfernu si la porta.

 

Mentri grida la figghia: su' pirduta!,

 

 

 

accurri la matri e chiangila pi morta.

 

Lu dogghiu é tali ca lu suli astuta

 

e la stagioni di l'invernu é sorta.

 

 

********** 

  

                    

 

 Leda e lu cignu

 

 

Leda lu cignu vitti nta lu stagnu

 

c' annacannu lu coddu jancu e longu

 

l'invitu ci mannava di bagnari

 

nta l'acqua cilistrina lu so corpu.

 

Idda nun lu sapeva ca di Giovi

 

c'era ammucciatu sutta di li pinni

 

lu santu lumi chinu di passioni.

 

Beddu ci parsi e lu disiu ci vinni

 

senza suspettu di tuccarlu tuttu.

 

Li ninfi di lu lagu cu mastria

 

li vesti ci livaru e tutta nuda

 

nta l'acqua l'ammuttaru duci duci.

 

Lu cignu l'avvicina e fa la rota,

 

cu lu coddu li minni ci carizza,

 

la vasa nta la vucca cu passioni,

 

d'amuri la cummogghia e la subissa.

 

Leda si duna e paradisu trova

 

nta l'acqua cilistrina di lu lagu,

 

unni paroli senti incantaturi,

 

ca Giovi finalmenti ci lu dici

 

d'impirsunari l'amurusu cignu.

 

Leda a lu lagu torna tanti voti

 

unni sempri lu cignu la pussedi

 

calannu di l'olimpu ad ali aperti.

 

L'amuri quann'é santu duna frutti

 

e frutti detti in veru troppu granni,

 

ca madri addivintavu Leda, e Giovi

 

patri, di figghi beddi e semidei.

 

Comu facissi a ginirari Giovi

 

sta bedda fighiulanza sutta furma

 

di cignu nun lu dici la liggenda,

 

c'alla fantasia duna focu e spaziu!

 

Sta di fattu ca Leda  l'ova scuva

 

e duna vita a Castore e Polluce

 

frati gemelli c'acchianaru in celu

 

e ad Elena la bedda ca di luttu

 

cummigghiavu l'antica Grecia e Troia.

 

 

********** 

 

 

 

La favula d'Arianna

  

Chi su' sti lacrimi virsati a ciumi?

 

Stu chiantu ca 'un finisci di calari?

 

Possibili c'ancora ti cunsumi

 

pi cosi ca nun s'hannu a calculari?

 

 

 

Asciucati l'ucchiuzzi beddi e duci,

 

ca ti cuntu na favula azziccata

 

e tu vidi c'a nenti si riduci

 

la to pena cu cura ammunziddata

 

 

 

ed anzi tantu megghiu ti cunvinci

 

ca si chiudi na porta, 'n-purticatu

 

si grapi sempri chiù granni, ca vinci

 

la prima pena e lu primu commiatu.

 

 

 

Nto mari Egeu c'é 'n-isula pitrusa,

 

chiamata Creta, unn'era re Minossi,

 

patri di na carusidda graziusa

 

di nomu Arianna. 'Un sunu cosi grossi

 

 

 

si dicu ca stu re tineva chiusu

 

nto labirintu, fattu fari apposta,

 

'n-armali stranu forti e spavintusu.

 

Avia testa di toru e senza sosta

 

 

 

furriava tornu tornu tra ddi mura

 

senza sboccu, addivatu cu custanza

 

di lu re ca ci dava pi pastura

 

picciutteddi ateniesi di sustanza.

 

 

 

La facenna di stu re e di st'armali

 

'un quadrava tantu all'ateniesi antichi,

 

custretti a fari i tristi cumminsali,

 

ondi per cui pi 'un perdiri chiù nichi

 

 

 

Teseu mannaru a Creta, eroi divinu,

 

dannuci incaricu precisu e chiaru

 

di fari siccu ddu mostru assassinu.

 

Furbu era stu Teseu e d'aspettu raru,

 

 

 

'n-masculu veru di chiddi triacusi,

 

varvutu e forti comu Diu cumanna.

 

Pensa perciò quali spini amurusi

 

e chi cattigghiu ci vinni ad Arianna,

 

 

 

quannu la scuncicò Teseu gluriusu!

 

Persi la testa fin'o puntu tali,

 

ca 'n-filu fici di cuttuni sciusu

 

pi veru longu e donu pirsunali

 

 

   fici all'amanti di 'n-grossu ruccheddu.

 

Cu stu filu nisciu du labirintu,

 

friscu e giummutu l'eroi Teseu, beddu

 

ca siccu fici l'animali tintu.

 

 

 

La bedda Arianna, comu ancora avveni

 

nta certi parti da Sicilia nostra,

 

scappavu cu lu zitu, ma di peni

 

accuminciavu subitu la giostra.

 

 

 

L'amuri di Teseu fu na minzogna,

 

c'appena si pigghiò piaciri e spassu

 

di dda carusa, comu na carogna,

 

la lassavu nta l'isula di Nassu.

 

 

 

Chianci Arianna lu so tristu distinu,

 

sula sulidda vicinu a lu mari,

 

cammina a zonzu cu lu cori chinu

 

d'amaru dolu e 'un sapi chiù chi fari.

 

 

 

Persi lu patri, l'amuri e la casa,

 

si trova sula senza chiù dinari,

 

nun c'é chiù nuddu ca l'abbrazza e vasa,

 

persi puru la vogghia di campari.

 

 

 

L'Olimpu tuttu n'ebbi compassioni

 

e chiù di tutti Veniri ruffiana,

 

facili a 'un perdiri l'occasioni

 

pi dimustrari ca l'amuri sana

 

 

 

ogni duluri in ogni circustanza.

 

Ordini detti o figghiu so Cupidu

 

d'abbiari nova freccia cu sapienza

 

o primu ca scuntrassi nta ddu lidu.

 

 

 

Lu casu vosi (e non fu sulu casu!)

 

c' azziccavu Cupidu senza scampu

 

lu Diu Baccu c'aveva ancora u nasu

 

arrussicatu i vinu. Comu 'n-lampu,

 

 

 

lu Diu 'mbriacu d'in terra si livavu

 

appena vitti accantu la carusa

 

e cu paroli duci ci parravu.

 

La bedda Arianna, sempri chiù cunfusa,

 

 

 

lu cori si strugghiu alleggiu alleggiu.

 

D'amuri e di vinuzzu beddu friscu

 

si linchivu, capennu ch'era megghiu

 

nun chiancissi e mittissi novu discu

 

 

 

d'amuri e d'alligrizza nte so cosi

 

e, speci quannu Baccu la cuprivu,

 

di piaciri acchiappanu tripla dosi,

 

quant'era megghiu di Teseu capivu.

 

 

   S'era forti Teseu e la suddisfava,

 

nun c'era paraguni ca riggeva,

 

pirchì sutta di Baccu si squagghiava

 

e d'Olimpu regina si sinteva.

 

 

 

E d'Olimpu davveru amata diva

 

addivintavu, comu vosi Baccu,

 

ca pi muggheri in celu la rapivu.

 

Filicità nasciu du primu smaccu!

 

 

 

**********

  

 

 

 

La favula di l'arvulu di pinu

 

 

Fimmini ca vi pigghia lu stinnicchiu

 

si d'arreri vi curri cu custanza

 

'n-picciottu innammuratu e poi lu picchiu

 

ci abbiati si finisci la spiranza,

 

sintiti ca vi cuntu comu 'n-ticchiu

 

nta l'amuri causò na gran duglianza.

 

 

 

C'era na vota nta lu munnu anticu

 

na picciuttedda duci, bedda e fina,

 

vistuta di na pampina di ficu,

 

ca sula stava e si chiamava Pina.

 

Chista non voli amanti oppuru amicu

 

o ganzu e di ristari signurina

 

 

 

prega lu patri Giovi ogni mumentu.

 

Lu sommu Diu l'ascuta e ci prumetti

 

ca, comu voli, 'un ci sarà st'eventu,

 

ma ci dici ch'é megghiu ca rifletti!

 

Non vulissi ca poi lu so lamentu

 

ci arrivassi a l'Olimpu cu dui-setti!

 

 

 

- Megghiu muriri senz'andari in celu,

 

megghiu arristari nta terra impicata,

 

megghiu essiri cangiata nta nu stelu,

 

ca d'essiri di 'n-omu accavaddata!

 

Pi chistu sulu campu! chistu anelu!-

 

ci arrispunnivu Pina all'impinsata.

 

 

 

Allura Giovi si cummossi tantu,

 

ca fici lu sulenni giuramentu

 

d'interveniri non appena scantu

 

ci fussi o d'idda nu sulu lamentu

 

nto celu n'acchianassi. Lu Diu santu,

 

pi sarvarla, prumetti ogni purtentu.

 

 

 

Duci Pina curreva nta lu boscu,

 

cu li minni vasati di lu ventu,

 

quannu Apollu cumparsi, in visu foscu,

 

ca caminannu cu lu passu lentu

 

circava certi fogghi. Comu tostu

 

vitti a Pina, ca non aveva abbentu,

 

 

 

lu Diu si fremma e guarda attentamenti

 

ddu pezzu di carusa tutta nura.

 

Lu sangu allura all'occhi immantinenti

 

ci acchiana comu nenti e chiù non cura

 

d'arricogghiri fogghi né sarmenti.

 

Ci misi in pettu Amuri na calura,

 

 

   ca lu cori ci abbrucia e 'n-autra cosa!

 

Ddi cosci d'alabastru, dd'occhi chiari,

 

ddi minni tisi, dda vuccuzza rosa,

 

lu fannu veramenti innammurari!

 

Comu fannu li tori misi in posa

 

quannu vonnu na vacca trabaccari,

 

 

 

lu Diu s'apposta in capu di na rupi

 

e pi nomu la chiama duci duci.

 

Pina, ca in testa avia ddi cosi cupi

 

ca sapiti, lu santu metti in cruci!

 

Comu s'avissi davanti li lupi,

 

scappa ed a la rincursa lu Diu induci.

 

 

 

Tri voti l'aggrancavu pi lu culu,

 

tri voti la picciotta si libbravu,

 

ma lu Diu chiù tistardu di lu mulu

 

chiù forti curri e infini l'affirravu.

 

Pina, a stu puntu, ca pinsatu sulu

 

aveva di scappari, si cimmavu.

 

 

 

Forsi fu pirchì lu Diu binidittu

 

nu malu sucazzuni ci ammiscavu,

 

forsi fu pi l'abbrazzu troppu strittu,

 

forsi pirchì na spina s'azziccavu,

 

o forsi chiù pi 'n-subitu appitittu,

 

'n-lamentu forti a Pina ci scappavu.

 

 

 

Lu sommu patri Giovi ca durmeva

 

a dd'improvvisa schigghia s'arrusbigghia

 

e quannu versu terra l'occhi leva,

 

senza mancu pinsari, 'n-lampu pigghia

 

e lu jetta cu la forza c'aveva

 

contr'a Pina ed Apollu ca la strigghia,

 

 

 

pi dari fedi o granni giuramentu

 

fattu a la figghia cu sulinnitati.

 

Ma Giovi nun s'accorsi ca lamentu

 

di piacirusa vogghia e non pietati

 

era chiddu di Pina in gudimentu,

 

ca stava fremma cu l'anchi apparati.

 

 

 

Beddu ca dda carusa si struggheva

 

comu ghiacciolu vicinu a lu focu

 

e di caluri novu si sinteva

 

bruciata nto pettu  ed in ogni locu,

 

lu lampu all'antrasatta la culpeva

 

e fridda la lassava dopu 'n-pocu.

 

 

 

Apollu ca sintiu la friscanzana,

 

pi tempu si canziavu di lu lampu,

 

mentri cumicia a divintari strana

 

la bedda Pina senza nuddu scampu.

 

Lu coddu ci si allonga, in celu acchiana,

 

s'azziccanu li pedi nta lu campu,

 

 

   si fannu longhi e brutti vrazza e minni,

 

ogni pilu diventa un'escrescenza,

 

la lingua in corpu si ni scinni,

 

lu bustu assumi tostu la parvenza

 

di 'n-arvulu nudusu, ma si tinni

 

di Pina l'alma, lu cori e l'essenza.

 

 

 

Pina accussì di lignu addivintavu,

 

'n-arvulu forti di furesta granni,

 

ca Giovi subitu Pinu chiamavu.

 

Quannu lu ventu curri tra li canni,

 

ripinsannu a la vita ca lassavu,

 

lu Pinu tutt'intornu chiantu spanni.

 

 

 ******** 

 

 

 

L'addavuru

 

  

O tu ca scianchi, bestia campagnolu,

 

'n-soccu ti pari e manni a la malura

 

l'addavuru ca crisci sarvaggiolu,

 

scanusci certamenti la natura

 

 

 

di st'arvulu famusu e purtintusu.

 

Ascuta li me versi impastizzati

 

ca cuntanu nu fattu piddicusu

 

ca capitavu nta l'antichitati,

 

 

 

unni si parra, tra li tanti cosi,

 

di st'arvulu divinu e comu nasci.

 

Ovidiu versi antichi già cumposi

 

supra sti fatti ca non foru vasci.

 

 

 

Pirtantu vidi l'impurtanza granni

 

ca st'arvulu ci aveva tempu arreri!

 

Quannu l'omu 'un purtava li mutanni

 

e camminava scavusu ed a peri,

 

 

 

c'era nu ciumi imparintatu strittu

 

cu li divinitati di ddu tempu.

 

'Nta l'acqui chiari ci purtava scrittu

 

ca curreva pi d'iddu lu bon tempu.

 

 

 

La terra accarizzava cu ducizza

 

e jucava ch'e canni trimulanti,

 

mentri nta l'acqua priva di munnizza

 

pascevanu li pisci trinchillanti,

 

 

 

li stiddi si tuccavanu c'a luna

 

e di jornu lu suli si vagnava

 

e lu ciumi filici li vasuna

 

cu lu celu turchinu si scanciava.

 

 

 

Non sulu cu lu celu si vasava,

 

ch'era di stiddi favulusu amanti

 

e fimmini baggiani c'acchiappava

 

cu li so vrazza d'acqua straripanti.

 

 

 

Li frutti si gudeva di sti amuri,

 

ca chiù di milli figghi nto so lettu

 

campavanu filici d'avvinturi

 

e patri lu facevanu dilettu.

 

 

 

Ma di sti figghi amati u nostru ciumi

 

una n'aveva fimminedda duci,

 

ca la vuleva beni chiù du lumi

 

di l'acqua ca scurreva e di la luci.

 

 

Quannu saltari la videva nura

 

supra li petri aguzzi di la riva,

 

scantatu ci diceva: - statti accura! -

 

e, si di vista 'n-pocu la pirdiva,

 

 

 

cu l'acqua vurticusa straripava

 

e l'arvuli e li petri s'agghiutteva

 

finu a quannu cu l'occhi la truvava

 

ed allura nto lettu si stinneva

 

 

 

e placidu scurreva nta lu chianu,

 

mustrannu paci, cuntintizza e risu

 

e vidiri putevi lu viddanu,

 

a culu a ponti supra l'acqua misu,

 

 

 

risceriri lu funnu cu li manu

 

e circari tisori nascunnuti.

 

Ma senti chi pastizzu cumbinaru

 

li divi di l'Olimpu, sti curnuti!

 

 

 

Intantu vi sia notu ca lu ciumi

 

di cui si parra si chiamau Perseu,

 

figghiu bastardu di lu sommu Numi,

 

e Daffini la figghia senza neu.

 

 

 

In occasioni di na certa festa,

 

scinneru in terra li divinitati

 

li chiù famusi di lu celu. In testa

 

Vulcanu c'era e Veniri abbrazzati

 

 

 

e dopu Apollu, Giovi cu Giunoni,

 

Marti bardasciu, Diana cacciatrici,

 

Arianna e Baccu, chini i commozioni,

 

ed Amuri ca veniri lu fici.

 

 

 

Comu papissi s'assittaru a latu

 

du nostru ciumi, ca ni fu cuntentu.

 

Puru li pisci tinniru lu ciatu,

 

ma Daffini 'un si scanta e sulu a stentu

 

 

 

lu patri la tratteni in menzu all'unni,

 

ca voli rimirari lu splinduri

 

di sti divinitati vagabunni

 

e nun pensa d'avirni imprusaturi.

 

 

 

Di Baccu lu vinuzzu nte bucali

 

prestu l'effettu fici d'imbriacari

 

sti divi comu misiri murtali.

 

Apollu in prima cuminciò a strammari.

 

 

 

A Veniri la pigghia a naticati,

 

a Giunoni ci tira la faretta

 

e comu vidi a tutti stravaccati

 

tira di fora nica na pumpetta.

 

 

Siccomu fannu i picciriddi tosti,

 

cumincia a turmintari tutti pari,

 

ma li cunti si fici senza l'osti!

 

Ca Giovi patri cumincia a lampiari,

 

 

 

Vulcanu  l'assicuta cu vastuni,

 

Marti ci sferra na pirata in chinu,

 

Baccu ci abbia lu vinu a cafudduni.

 

Sulu Amuri, lu chiù nicu, lu mischinu,

 

 

 

non potti ca scappari du 'mbriacuni!

 

Allura Apollu l'assicuta e dici:

 

- O figghiu di buttana e vastasuni

 

ca mancu sai lu patri ca ti fici,

 

 

 

si t'acchiappu ti fazzu na lavanna,

 

ca nun la scordi, pezzu di jarrusu! -

 

Scappannu d'ogni latu e d'ogni banna

 

si stancavu lu poviru carusu.

 

 

 

Quannu infini si vitti propriu persu,

 

da faretra tiravu na freccia d'oru,

 

l'arcu 'ncuccavu e dissi: - Ora t'abbersu,

 

pezzu di bastardu, natu in celu di straforu! -

 

 

 

Comu la freccia in pettu lu cintravu,

 

Apollu vitti a Daffini nto ciumi

 

e subitu d'amuri s'addumavu.

 

Ma s'iddu persi novamenti u lumi,

 

 

 

sta vota non pi vinu ma p'amuri,

 

nun persi la ragiuni la picciotta

 

pirchì freccia di chiummu lu caluri

 

ci astuta d'ogni amuri cu na botta.

 

 

 

Cu granni meravigghia di Perseu,

 

Apollu si tummavu nta lu rivu

 

e senza mancu diri marameu

 

chiù assai di centu metri pircurrivu.

 

 

 

Appena la picciotta raggiungivu,

 

- bedda, ci dissi, bedda chiù du suli,

 

tu gigghiu si’ di Veniri vutivu!

 

Cu mia nto celu veni e suli suli

 

 

 

a cavaddu di l'Iridi curremu

 

e nta l'eternu amuri ti sprufunnu. -

 

Ma Daffini arrispunni: - Tu si scemu!

 

Cu tia non vegnu e restu nta stu munnu!-

 

 

 

Allura Apollu, ch'era malandrinu

 

e d'amuri scuceva svisciratu,

 

pinsavu di furzari lu distinu

 

ca lu vuleva persu e buzzaratu.

 

 

- Ti vogghiu, dissi, e cca ti fazzu mia! -

 

e subitu s'allanza comu 'n-braccu.

 

Ma sutta l'acqua Daffini s'abbia

 

ed Apollu ni pigghia sulu smaccu.

 

 

 

Perseu patri ca vitti la sunata

 

e non sdignava d'essiri parenti

 

d'Apollu, dissi tostu: - Dissinnata,

 

nun ti scanzari di stu Diu putenti!

 

 

 

Maritati cu d'iddu e fammi nannu

 

di niputeddi figghi di lu celu,

 

ca d'accussì tu campi senza dannu.

 

Ju pi tia chistu vogghiu, chistu anelu! -

 

 

 

- O me patruzzu tu m'ha pirdunari,

 

chiancennu dissi Daffini a Perseu,

 

a chissu nun lu vogghiu suppurtari,

 

di ssu mostru nun vogghiu nuddu addeu!

 

 

 

L'amuri ca mi porta mi fa schifu,

 

l'affettu ca mi mustra nun lu vogghiu.

 

Megghiu stari cu 'n-porcu nta lu scifu,

 

ca suppurtari in celu lu so sbrogghiu!

 

 

 

E tu, patruzzu miu, ca mi vo beni,

 

sdivaca cataratti e mulineddi,

 

Apollu fremma prima ca m'impreni,

 

si mi vo dari appressu tempi beddi.-

 

 

 

Lu ciumi a stu parrari si cummossi

 

e la figghia pinsavu di sarvari.

 

Versu la terra accantu l'acqua mossi

 

e Giovi cuminciavu ad annaciari.

 

 

 

Comu l'acqua lu vinu scancillavu,

 

ad Iddu ci cuntavu lu mal fattu

 

e di sarvari a figghia lu prigavu.

 

E prima ca d'Apollu lu misfattu

 

 

 

putissi aviri signu e cunsistenza,

 

affirrari s'intisi p'e capiddi

 

la vergini scuntrusa cu viulenza.

 

Ci parsi d'acchianari tra li stiddi,

 

 

 

ma tostu impiccicati in terra vitti

 

li jammi non chiù janchi ma virdastri

 

e supra a testa divintari ritti

 

li pila de' capiddi senza nastri.

 

 

 

Cummigghiari si vitti panza e minni

 

di fogghi sempre virdi e lungarini

 

e lignu divintari senza spinni

 

lu corpu scarnu privu di catini.

 

 

Apollu abbabbanutu si firmavu,

 

ma d'essiri gabbatu 'un si ni fici,

 

c'anzi la testa tutta s'adurnavu

 

cu dui ramuzzi virdi e forti dici:

 

 

 

- Addavuru ti chiamu e ti battizzu

 

o picciuttedda ca mi resti cara.

 

Si nidu addivintasti di marbizzu,

 

pi tia distinu granni si pripara.

 

 

 

Ju, ca di l'arti sugnu patri santu,

 

cca decretu ca pi l'eternitati

 

sti fogghi virdi sunu onuri e vantu

 

di cu' li gari vinci e di li vati! -

 

 

 

Ora capisci, pezzu di viddanu,

 

pirchì 'un si scianca st'arvulu divinu?

 

Chiù tostu é megghiu ca ti tagghi i manu

 

e st'arvulu lu lassi o so distinu.

 

  

 *********

 

 

 

Lu mitu d’anémuni

 

 

Tra l’erba da campagna a primavera,

 

spunta suventi acculuratu ciuri,

 

ca puntiannu lu virdi appena natu,

 

sbrizzia biddizza comu fussi festa..

 

Stu ciuri anticu, anémulu chiamatu,

 

lu mitu rapprisenta da natura,

 

ca nesci di lu sonnu di lu ‘nvernu.

 

Comu si cunta nta l’antica Grecia,

 

quannu stu ciuri ancora mancu c’era,

 

a Cipru, dunni Veniri nascivu,

 

la principessa Mirra malamenti

 

d’amuri s’addumavu di so patri

 

e dopu novi misi fici ‘n-figghiu,

 

ca frati ci vineva e ni era matri.

 

Veniri, ca l’incestu  pirmittivu,

 

a Cìnira, lu malu patri e regi,

 

cunsigghiu detti d’ammucciari tuttu,

 

perchì ssu figghiu lu distinu voli

 

ca prestu addivintassi lu chiù beddu

 

di l’omini murtali e di li Dei.

 

Criscivu Aduni a Cipru comu ‘n-gigghiu,

 

beddu di facci e corpu, ca li sensi

 

adduma e cu’ lu sguardu supra d’iddu

 

poni magari a casu e pi’ tanticchia,

 

ardi d’amuri e non lu scorda mai.

 

Non puteva non divintari amanti

 

di Veniri bagascia, ca lu vitti

 

ciuriri a picca a picca e divintari

 

beddu e pussenti chiù di Marti stissu

 

e lu cugghivu senza aviri scornu

 

d’essiri diva  ed iddu insanu fruttu

 

d’amuri stortu, ca lu munnu abborri.

 

Ma si stinnicchiu a Veniri ci vinni

 

di lu picciottu, non fu certu sula,

 

ca Cipru addivintavu lu ritrovu

 

di fimminili sbaddu e caccia fera!

 

Sintiti chi successi na matina,

 

ca pi’ curpanza d’iddu li capiddi

 

dui santi di l’Olimpu si tiraru!

 

Lu primu jornu di la primavera,

 

mentri nisceva di l’u ‘nfernu amaru,

 

comu dittavu lu putenti Giovi

 

dopu lu rattu ca Plutoni fici,

 

Persefoni lu vitti ca durmeva

 

vistutu sulu d’acquazzina e luci,

 

c’Apollu stuzzicusu lu culpeva

 

facennu risaltari li so furmi.

 

La povira rigina di li morti,

 

ca pi’ sei misi non videva luci

 

ed era stanca di suppurtazioni,

 

appena l’occhi posi supra Adoni,

 

d’amuri s’addumavu e di passioni.

 

Beddu ca stenni l’amurusa manu

 

Pi’ cogghiri ddu ciuri priffumatu

 

E cummigghiarlu tuttu cu l’aluni

 

Di la divinitati di l’infernu,

 

na vuci, anzi nu gridu, la subissa

 

e frena d’idda l’azzardatu gestu.

 

E’ Veniri ca parra e ca la ferma.

 

- Arrassu – dici la divina matri –

 

di ssu ciurutu  stelu  ch’è già miu!

 

Ritorna ‘ngramagghiata nta l’infernu

 

e si di to maritu nun t’abbasta

 

lu calurusu abbrazzu nta lu lettu,

 

rinfrisca li to sensi nta lu Stigi,

 

ca d’acqua è chinu ed omini dannati,

 

pirchì nun è pi’ tia sta cosa bedda,

 

ca vosi e mi criscivu a muddicheddi.

 

Non ti scurdari ca lu to distinu

 

è chiddu di rigina sutta terra

 

e ca lu celu m’apparteni a mia! –

 

E d’accussì parrannu afferra tostu

 

li trizzi di Persefoni e la tira

 

comu fussi na petra di la terra

 

luntanu di ddu postu e poi si godi

 

d’Aduni lu sdilliziu di l’amuri.

 

A chiangiri Persefoni si metti

 

e cu l’occhi s’appressa lacrimusi

 

a Ceriri so matri,  ca l’aspetta.

 

Ad idda cunta lu smaccusu fattu

 

ca Veniri ci fici e la passioni

 

ca dintra teni pi’ lu beddu Aduni

 

e ch’è la sula cosa ch’idda voli.

 

niscennu tutti l’anni di lu ‘nfernu..

 

La matri non supporta dda chiangiuta,

 

ca pi’ dda figghia persa pi’ mitati

 

la vita dassi puru si divina,

 

e curri, comu sempri, a riclamari

 

unni tuttu si poti, faci e sfaci.

 

A Giovi s’apprisenta sunnacchiusu

 

pirchì lu tempu scurri ed è cuntentu

 

ca tuttu pari bonu nta lu munnu.

 

Sonnu ci passa immantinenti quannu

 

lu chiantu lu rusbigghia  di la terra,

 

ca Ceriri sulerti suscitavu

 

ed idda ascuta ca prigannu dici:

 

- A tia ritornu, Patri, cu lu cori

 

ancora scunsulatu pi’ lu tortu,

 

ca Plutoni mi fici tempu arreri

 

e ca tu riparasti pi’ mitati.

 

Tu cuncidisti ca mità di l’annu

 

Proserpina, muggheri di Plutoni,

 

passassi sempri supra di la terra,

 

gudennu li sdillizii  di la vita,

 

ca puru a li murtali sunu dati.

 

Pirchì s’opponi allura dda bagascia

 

di Veniri me soru, a lu to dittu

 

ed a me figghia ‘nsulta e guerra faci?

 

Pirchì sta gran buttana, ca ‘un ci basta

 

di Marti, Anchisi, di Vulcanu ed autri

 

lu sbrogghiu sempiternu , voli puru

 

d’Aduni assapurari la biddizza,

 

rubannullu a me figghia, puvuredda,

 

stanca di stari sulu cu Plutoni?

 

Ti pari giustu ca me figghia soffri,

 

dopu sei misi di spittanza amara,

 

puru li peni d’impidutu amuri,

 

ca Veniri c’imponi capricciusa?

 

Vogghiu ca tu m’ascuti e non cunsenti

 

C’Aduni fussi sulu d’Afroditi,

 

ma puru di me figghia ca lu voli. –

 

Giovi, ca già sapeva di st’Aduni

 

e di l’amuri ca Veniri ci porta

 

e quannu e comu vinni fattu a Cipru,

 

capivu a volu ca nun era veru

 

ca Veniri arrubbava nudda cosa

 

a Ceriri e so figghia, ma siccomu

 

vuleva sempri ca rignassi a paci

 

tra li divinitati di l’Olimpu,

 

pinsavu comu fari pi’ cimmari

 

la raggia di Persefoni e so matri

 

e nun fari scuntenta l’autra Dia,

 

ca pi’ certu  ci aveva chiù dirittu

 

di stari nta lu lettu cu ddu pupu.

 

Pensa e ripensa dicritavu infini

 

Di trasfurmari Aduni nta nu ciuri,

 

c’a primavera rinascissi sempri

 

e filici Persefoni facissi

 

beddu ca fora nesci di l’ìinfernu

 

e Veniri cuntenta n’arristassi,

 

ca pi’ l’eternitati Aduni pòti

 

sempri vidiri quannu e comu voli.

 

E d’accussì nascivu ‘n-novu ciuri,

 

anémuni chiamatu, ca d’Aduni

 

ci aveva tutti li biddizzi funni

 

ed essiri puteva pussidutu

 

di cu’ lu guarda senza l’esclusiva

 

di Veniri e Persefoni divini.

 

 

*********

 

  

 

Aci e Galatea

 

   

C’era na vota ‘n-ciumi, ca di l’Etna

 

scinneva e sciddicannu duci duci

 

tra li petri di lava anniricata,

 

a mari si jttava allegramenti,

 

unni cu l’acqua frisca di muntagna

 

a biviri ci dava cu piaciri

 

a la figghia di Doridi e Nereu,

 

ca si chiamava giustu Galatea.

 

Aci, lu ciumi si chiamava ed era

 

Di na biddizza rara veramenti,

 

ca tutta la muntagna arraccamava

 

cu saj e funtaneddi trinchillanti,

 

unni jucannu i pisci a mucciaredda

 

facevanu cu d’iddu gran fistinu.

 

Trasennu nta lu mari s’arrizzava

 

e mulineddi di vasuni dava

 

a la ninfa, accurrenti di lu funnu,

 

c’a trasiri nto ciumi accuminciava

 

ed era amuri veru finu ad unni

 

l’acqua nisceva di la fonti a munti.

 

Li vitti Polifemu cu dd’ucchiazzu,

 

ca tempu dopu Ulissi c’intuppavu,

 

e lu disiu ci vinni ‘i furnicari

 

cu la divina figghia di Nereu.

 

Chinu d’amuri e raggia lu giganti

 

pi’ l’amurusu amplessu di lu ciumi,

 

a jttari si misi cu la pala

 

ciumi di lava supra ddu mischinu

 

e l’acqua ci sucavu cu lu focu

 

finu a la fonti ca ‘ntuppavu puru.

 

Mori lu ciumi tuttu ‘n tempu nenti

 

e nura resta nta lu lettu asciuttu

 

la ninfa apparicchiata pi’ l’amuri.

 

L’afferra Polifemu assatanatu,

 

ca nun lu frena chiù lu ciumi siccu,

 

né d’idda la chiangiuta prirumpenti,

 

e cu viulenza e forza la pussedi.

 

Nascivu di dd’amplessu ‘n-figghiu sulu,

 

ca la matri Galati lu chiamavu

 

e vicinu a lu mari l’addivavu.

 

D’Aci non resta chiù ca numinagghia

 

supra la terra ca lu vitti vivu

 

e ca di virdi tutta s’ammantavu

 

pi’ vuluntà di Ceriri pietusa

 

e d’iddu e di Galati sunu vivi

 

li nomi, ca citati addivintaru,

 

unni lu mari ancora si cunnuci

 

e di la ninfa ciavuru si senti.

 

 

********

 

Lu mitu di li Frati Palici

 

Lu mitu voli ca lu patri Giovi,

quannu s’acchiappava cu Giunoni,

muggheri anticchia tinta e gnurriusa,

facissi scappateddi nta lu celu

circannu di sfugari la so raggia.

Na vota, ca partivu di l’Olimpu

‘ncazzatu comu un pupu saracinu,

vitti assittata supra la muntagna,

unni Vulcanu l’officina aveva,

la so figghiuzza naturali schetta,

ca ciuri arricuggheva d’ogni tipu.

La guarda Giovi, misa a culu a ponti,

e senza tanti complimenti scinni

di supr’a nuvula ca lu cunnuceva

e terra tocca in menzu di lu pratu.

Dda bedda figghia, ch’era virginedda,

e Thalìa si chiamava, si non sbagghiu,

sintennu la prisenza prirumpenti

di Giovi ca la pigghia pi’ darreri

non fici tentativu di scappari,

ca tostu s’aggiuccavu sutta d’iddu.

Guarda Giunoni, gilusazza, tuttu

e quannu Giovi arriscialatu vidi

nte nuvuli acchianari chiù liggeru,

minnitta voli fari di li corna.

A scappari accumincia la carusa,

ca l’assicuta la rigina matri.

Scarpisa ciuri, pianti ed armaluzzi

e, menza nura, trasi nta na rutta

di la Muntagna, ca matri ci veni.

Di dda non nesci chiù Thalìa,

pirchì si scanta d’essiri acchiappata.

Di Giovi intantu la passioni santa

la panza ci vunchiavu a dismisura,

pirchì nun sgarra mai stu Patreternu

di fari figghiulanza nta lu munnu.

Passaru jorna, misi e quantu basta

pi’ divintari matri primarola

la figghia ammucciatedda  di Vulcanu.

Quannu lu tempu vinni ca nasceru

li figghi di la Ninfa tutti pari,

successi ‘n-cataclisma veramenti!

La terra si rumpivu comu vitru,

crafòli cumpareru grossi e larghi,

di sùffuru vugghenti sparpagghiatu

nto celu ca giallinu addivintavu

e d’ogni purtusiddu ca spuntava

nasceva na muntagna picciridda

ca prestu d’erba frisca si visteva.

Eranu chisti i figghi di Thalìa,

ca Giovi nun li vosi sutta terra

pi’ farici dispettu a la muggheri,

lassannu stari cummigghiata a matri,

luntana di lu cori e di la vista.

Unni lu chianu si stinneva incuttu,

nasceru sti muntagni sempri virdi,

ca sunu munti Palici chiamati,

pi’ ricurdari ca d’Etna e Vulcanu,

diretti figghi prediletti sunu.

Supra sti munti Palici assittata,

Palagunia nasceva tempu arreri

e li misteri cilibrannu jeva

di sti fratuzzi ca divini sunu

e Siculi di marca senza dubbiu. 

 

 *******

 

Lu mitu d’Anapu e Ciani.

 

Quannu, ‘nfuddutu d’amurusu spinnu,

Plutoni  nta la terra cumparivu

e senza tanti complimenti in attu

Proserpina affirravu pe’ capiddi

e  si la misi supra di lu cocchiu

pi’ poi tummari in menzu di li morti,

li ninfi tutti ca d’intornu aveva

ristaru fermi chini di spaventu.

Ma Ciani, la cumpagna chiù vicina

vincivu lu spaventu e cu curaggiu

a  lu cocchiu currennu s’appizzavu

circannu di firmarlu, puvuredda.

‘Nfuddutu di passioni u re Plutoni

‘n-corpu di scettru ci ammiscavu in testa..

Stramazza in terra Ciani e tutta para

si strogghi comu l’acqua di ‘nu ciumi.

Quannu scumpari lu carrettu amaru

nto funnu di la terra cu’ Plutoni,

Ciani, ciumi ristavu azzurru e tersu,

c’ancora curri versu di lu mari.

A tantu scempiu d’Anapu lu cori

di chiantu si strugghivu in tempu nenti

e  cu’ lu ciumi amatu si cunfusi.

Ed ora assemi tu li vidi ancora

all’ummira de’ canni di papiru,

 

c’a Siracusa sunu sempri vivi.

 

*******

 

Il caro, vecchio Publio Ovidio Nasone per me è sempre attuale. Le Metamorfosi parlano di questi due miti: quello di Narciso e quello di Giacinto. Il nostro vernacolo è molto adatto alle favole mitologiche. 

 

                                              Narcisu e l’Ecu

 

Quannu la ninfa da muntagna, l’Ecu,

vitti a Narcisu nta lu chianu misu

ca si pasceva di bidizza e vantu,

d’appressu ci currivu pi’ vasarlu.

Ma lu picciottu, ca  Tiresia anticu

prufitizzavu amara canuscenza

di chiddu ca valeva pi’ davveru,

a curriri si misi supra l’erba,

appressu di dda vuci ca chiamava

e  lu circava, ma luntanu stava.

Parrava l’Ecu, ma non l’ascutava

Narcisu, ca sinteva sulamenti

l’ultima parti da parola ditta,

comu  Giunoni dicritatu aveva

pi’ lu gran tortu ca ci fici prima.

A gridari si misi lu picciottu

addumannannu cu’ ci fussi ddà…

La vuci ci arrispunni: ddà… ddà …   ddà…

e rincurrennu la so stissa vuci

agghica finalmenti ansanti e stancu

unni nu specchiu d’acqua cheta e duci

a biviri l’invita ed a  guardari.

Vidi  la  facci soi e s’innamura

E tantu fu lu preju e l’emozioni,

ca  in terra resta stisu senza vita

e ciuri  t’addiventa  pi’ l’eternu,

 

pirchì nun c’era nudda cosa  o munnu

ca vinciri putissi u so distinu,

di ciuri addivintari senza paru,

ne chiddu d’Ecu di luntanu stari

e smuzzicari vuci risunanti.

 

 

Lu mitu di Giacintu

 

Lu Diu c’a Delu pari ca nascivu,

mavaru e patri de’ mavari tutti,

fighiu di Giovi e di Latona matri

fama gudeva d’essiri superbu

e purtintusu amanti nta lu munnu

di fimmini divini sulamenti.

Ma dda famusa vota ca scinnivu

a Sparta friscu e senza  paraventu

ca ci ammucciassi l’attributi soi,

 si vitti accarizzari  tuttu paru

di ‘n-carusazzu beddu cchiù do suli

ca scarruzzava in celu tutti i jorna.

D’amuri s’addumò cu dda tuccata

comu s’avissi pi’ davanti ninfa

sciantusa e duci di lu firmamentu.

Curpanza n’ebbi Cùpidu, so’ frati,

ca  la mira sgarravu nto tirari

la solita fricciuzza di passioni.

A matula di Véniri lu fighiu

ci dici ca sbagghiavu nto tirari

  e stassi attentu ca finocchiu, dopu,

la fama avissi avutu nta lu munnu.

Nun senti vuci e chiantu Apollu Santu

ca tira drittu cu’ passioni nova

e lu picciottu abbrazza e si lu porta

luntanu nta lu campu di l’amuri.

Ddà  a jucari si misi cu’ la spada,

l’elmu e lu scudu e fari li purtenti

ca fàciri suleva lu picciottu,

spartanu e fighiu di lu regi puru.

Ad iddu ammustra puru di sapiri

lu discu maniggiari e poi lanciari,

ma beddu ca vulavu la ciappedda

lu vinticeddu Zefiru ammucciatu,

gilusu di l’amuri, ca  nto cori

 mutu pasceva versu lu Santuni,

ciusciò cchiù forti e quantu basta appena

pi’ rùmpiri la testa a lu picciottu.

Chi fu - ci dissi Apollu - cori miu?

Ma ‘un ascutavu lu carusu, mortu

cascatu senza mancu diri “piu”.

Chiangivu Apollu lacrimi di sangu

ca ficiru ciuriri in tempu nenti

nta ddu precisu postu di duluri

nu ciuri novu beddu e sapurusu,

 

ca si chiamò Giacintu pi’ l’eternu.  

 

**********

 

 

A tragedia di Fetonti

 

Dici lu mitu c’Apollu non fu

sulu mavàru e purtaturi puru

di pistilenzi ed autri purtenti.

Pari ca lu travagghiu aveva ancora

di scarruzzari  da matina a sira

lu suli risplendenti nta lu celu.

Pi’ fari stu travagghiu si sirveva

di na carrozza tutta rilucenti,

tirata di cavaddi sarvaggioli,

dumati sulu da so’ manu mastra.

Nuddu cuccheri e nudda manu ferma

putia li retini tuccari anticchia

di ddi cavaddi, avennu la pritisa

di farli caminari, anzi vulari

nta lu celu di nuvuli cunfusu,

comu suleva sempri fari Apollu.

Fetonti , ‘n-jornu frati di lu Diu

pinsò di fari cosa bona certu

e senza nenti diri a lu so frati,

a la carrozza misi li cavaddi

e cu mastria pinsavu di tirari

li retini attaccati a li vuccagghi.

Vulavu la carrozza attruppicanu

nte nuvuli d’attornu senza scampu,

giravanu scumposti li cavaddi

ed iddu sbuvattatu vinni in celu

comu na fogghia ca lu ventu annaca.

Tummavu comu petra di sdirrubbu

nto centru di lu ciumi ca s’allarga

e t’addiventa ddocu na paludi.

S’arrusbigghiavu Apollu e vitti in celu

li so’ cavaddi curriri ‘mpazzuti

e la carrozza  saltillanti arreri,

mentri Fetonti in acqua sguazzariava;

lassavu ca murissi senza aiutu,

circannu d’acchiappari li cavaddi,

ca canusciuta la so manu ferma

di l’angiuli l’aspettu ripigghiàru.

Muriu Fetonti e n’ ebbi sulu pena

di  li divinitati di lu ciumi

ca pi’ tri misi a chiangiri ristàru.

Allura Apollu, ca si cummuvivu,

in arvuli pizzuti trasfurmavu

li lacrimi divini di li ninfi

e decretavu c’avissiru custanti

la prisenza vicinu di li tombi

nte nostri Campusanti e tra li morti.

Ju m’addumannu si l’antichi genti

pinsavanu di  favuli cuntari

oppuru di miraculi mustrari

di li divinitati di ddi tempi!!

 

  

 

Chiluna la tarduna

 

Era pinseri di l’antichi Greci

ca li divinitati di l’Olimpu

senza menu facissiru li cosi

di la genti, ca  nta la  terra  stava.

Pi’ stu motivu pensanu ca Giovi,

puru s’ anticchia fimminaru fussi,

fici lu  passu di lu matrimoniu.

Lu mitu voli ca Giunoni ‘n-jornu

cu’ Giovi si spusavu nta l’Olimpu

e comu fannu li murtali in terra,

festa si fici granni nta li celi.

Scasàru d’ogni parti ninfi e dei,

ca l’essiri presenti bisugnava.

Nun si trattò di  vecchi  strapazzeri,

ma di divinitati assai putenti.

Quannu fineru tutti di libari,

Chiluna, s’apprisenta ca si scusa

d’aviri fattu tardu ad arrivari

e mentri Giovi arriri, ca la cosa

ci pari i picca cuntu, di Giunoni

la facci si stracancia  e poi ci dici:

“Brava Chiluna! Si’ davveru brava!

U sai chi ti dicu, bedda mia?

Vistu ca l’ultima arrivasti ccà,

ju ti cunnannu ad essiri accussì

pi’ tutta a vita e pi’ l’eternità.

Non cchiù Chiluna, ma tistunia si!

 

 

Lu mitu di Scilla e Cariddi

 

Unni Trinacria guarda e quasi tocca

la terra calabrisa cu’ li manu,

lu mari curri trùbulu cu’ l’unni

tra li dui scogghi ca di fronti stannu.

Cunta Virgiliu e lu cunferma Ovidiu,

l’omerici discursi ripigghiannu,

ca Scilla e poi Cariddi  fòru misi

pi’ vuluntà divina a dari ‘mmestu

a cu’ passassi navigannu u strittu.

Era Cariddi, fighia di Nettunu,

ca ad Erculi li voi ci arrubbavu;

allura Giovi ad idda cunnannavu

cu na saitta fulminanti in siccu

a divintari scogghiu, ca sucassi

l’acqua marina e poi  la rimannassi,

almenu pi’ tri voti nta nu jornu

facennu mulineddi di sustanza,

capaci d’agghiuttìrisi  na navi.

Era di contru figghia di Tifuni

la calabrisa Scilla e d’Echidina,

ca scammisata e scàusa la sira

suleva sula scinniri a Missina,

pi’ godiri di Zéfiru lu friscu.

La vitti bedda Glaucu u  pisciaru

ca divintavu santu di lu mari

pi’ vuluntati d’Oceanu e di Teti,

e d’amurusu sensu s’addumavu.

Ma si scantavu Scilla ca scappavu

e lu mischinu allura a la mavàra

ca Circi si chiamava ci cuntavu

l’amuri ca ci aveva nta lu cori.

“Lassa stari, ci dissi la matruna,

ca d’amurusu affettu  ti cummogghiu

si tu cu’ mia ti resti e nun la pensi”.

“Ma chi si’ scema, dissi u piscaturi,

a Scilla vogghiu ca mi piaci assai,

amari a tia non pozzu certu  mai”.

Allura Circi chi pinsò di fari?

Scilla aspittavu na sirata a mari

E quanu arrivari  sula la vidi,

l’afferra  pe’ capiddi e la scutòla

cu forza nta lu mari finu a quannu

li jammi addivintaru mussi  ‘i cani

cu li mulari pronti a muzzicari.

La tumma dopu avanti di Cariddi

e comu ad idda in petra la trasforma.

Non hannu scampu l naviganti tutti,

ca pàssanu di ddocu, mischineddi,

pirchì Cariddi li so navi sbatti

contru di Scilla ca li sfascia tutti.

 

 

 

 *********

 

Lu mitu d’Europa

 

Supra na nuvula assittatu soru

scinneva Giovi  in terra na matina,

unni  ‘n-artaru l’aspittava a Tiru

apparicchiatu apposta di lu regi

cu’ nu scannatu ed arrustutu voi

pi’ darici l’onuri di santuni.

Lu mari varda  appitittusu e chetu

e vidi a ripa na carusa a moddu

vistuta sulu d’acqua e nenti cchiù.

La fami ci passavu di mangiari!

Li sensi s’addumavu immantinenti

e scinnivu da nuvula currennu,

ma pi’ non dari sconsu cu’ la luci

d’Olimpu, ca d’appressu si purtava,

l’aspettu pigghia di nu jancu toru

cu prirumpenti corna beddi duri,

pirchì sapeva ca dda carusidda

trattava beni tutti l’animali.

Non dissi nenti e mancu nenti fici;

sulu d’accantu ad idda s’aggiuccavu

e mentri la vardava intensamenti

cu l’occhiu tunnu chinu di passioni

la cattigghiava duci cu la cuda,

comu fussi ‘n-punseddu di pitturi.

La picciuttedda, ch’era virginedda,

e nenti suspittava di ddu toru,

ca ci pareva saggiu e senza dannu,

l’accavaddavu cu’ li jammi stritti

supra li cianchi, ch’eranu pussenti.

S’addrizzavu lu toru immantinenti

e nta lu mari si tummavu tostu

cu supra la carusa ca jucava.

Spingiutu a razzu di Nettunu amicu,

friscu e giummutu a Creta arriva e parra,

dicennu ch’era Giovi e chi l’amava.

“E no, - ci dissi -  non ti vogghiu Giovi,

fammi  tunnari a Tiru si t’aggrada.”

“Ma chi si scema ed iu chi sugnu alloccu?

Ju ccà ti pigghiu e ccà ti fazzu mia.”

Scappa la figghia e l’assicuta Giovi,

ca all’ultimu la ‘ntaccia nta lu truncu

di ‘n-arvulu di platanu vicchiuni.

Tri voti la pigghiavu u Diu vastasu,

e tri voti  figghiavu figghiulanza

la povira carusa prigiunera.

Minossi fu lu primu da partita,

ca dopu addivintavu re di Creta

e di lu labirintu lu patruni.

Muta chiangennu taliava fora

di l’isula la terra, ca davanti

ci aveva  e la pinsava bedda e duci,

chiamannula nto sonnu comu ad idda..

Pinsava ca dda terra fussi amuri,

ca Creta ci pareva na prigiuni,

unni ‘nchiuvata vinni senza paci

da Giovi ca l’aveva  in sudditanza,

luntanu di lu patri e di la matri.

Turnari  nun puteva ca Nettunu

a vista la vardava e nuddu toru

muntari cchiù puteva pi’ scappari.

L’antichi Greci dda sunnata terra

Europa la chiamàru sempri allura

pi’ farni vivu lu pinseri fattu.

Si ‘n-palancuni, cu’ lu dui frigiatu

ed ora fattu in Grecia, v’attruvati

tra li manu  e d’arreri lu vardati,

sta storia ca vi cuntu la viditi,

ca foru  i Greci primi ad invintari

la terra di l’Europa principissa

senza pinsari lu gran dannu avutu.

 

 

Lu mitu dii Daffini

 

A dui pasturi antichi di ddi tempi,

Virgiliu fa cantari vita e morti

di Daffini lu  santu sunaturi

di milli e  passa melodii d’amuri,

unni la terra ammustra li tisori

ca ci havi nta lu cori e nta la menti.

Dunni lu ciumi anticu  Irminiu scurri,

nto funnu da Trinacria rilucenti,

Mercuriu addeva stu so’ figghiu amatu

ca giniravu cu’ na fimminedda

nto celu svulazzannu comu ventu,

mentri sinteva nta la notti funna

d’ ariddi e di cicali lu cuncertu.

 

Iddu, ca latru fu  lu cchiù putenti,

nu figghiu giniravu veramenti

riccu d’ingegnu musicali e cantu.

Mancu diri si po’ ch’era  bardasciu,

pirchì d’amuri s’addumò na vota

ed a Giunoni , sòggira crudeli,

giuravu ca tradutu nun avissi

mai  so’ figghia Echemenide spusata.

Sapia cantari u sonu di lu ventu,

c’accumpagnava cu la so’ sampugna,

ca lu divinu Pani c’insignavu

e nudda fimmina da terra mai

l’happi p’amanti e mancu di l’Olimpu.

Ma na jurnata ca invitatu vinni

da lu re  Zenu a ricitari carmi,

sintiti chi successi nta la reggia.

La rigina, Climènidi chiamata,

ca d’amurusu spinnu era pungiuta,

pirchì lu re nun la circava tantu,

la sampugna circavu d’acchiappari

ad iddu ca sunava veramenti.

“ Chi fu - dissi – rigina, ca mi tocchi

la sampugna ca sonu cu passioni ?

Si tu la tiri comu voi ca sona?”

…E si spannivu di cchiù lu sonu duci,

senza lu benestari da rigina.

Idda capivu  ch’era fermu  l’omu

a non tradiri la muggheri soi;

sintiti allura chiddu ca ‘nvintavu.

Na caraffa priparavu di vinu,

di chiddu in petra di la vigna reggia,

e dintra ci ammiscavu macinati

d’addauru li pampini scippati,

c’ a Daffini  ci detti a sira dopu.

Matruzza bedda mia chi successi!

Non sacciu s‘ata vistu  lu cavaddu

assicutari a fimmina in caluri

nto centru di nu bagghiu beddu chiusu

oppuru un toru caricari a tappu

na vacca ca si sbraca nta la stadda;

accussì Daffini la cursa pigghia

e la rigina acchiappa immantinenti.

Giunoni ca la scena varda muta,

lu tradimentu annota di lu vati

a la so’ figghia, ca nun s’aspittava.

Lu pigghia pi’ n’aricchia e lu cunnanna

a fari  lu canturi di li campi,

ma privu  di la vista e di la casa.

Ristò pi’ sempri ad essiri lu vati,

ca cu’ lu sonu di la so’ sampugna

accumpagna  lu frùsciu di lu ventu

e lu smurzatu murmurìu di l’acqua

ca batti sciddicannu supra  a  terra,

senza spiranza di ristari mutu,

‘n-minutu sulamenti di la vita.

Ancora sona e lu sintiti sempri

duranti li timpesti e li tifuni,

oppuru quannu  passa duci duci

supra lu tempu ca silenti scurri.

 

 

Lu mitu di Aretusa

 

Ni cunta Omeru ca l’antichi Dei

Facevanu  tra d’iddi spusalizi,

ma si lu spinnu e cori ci pigghiava,

facevanu l’amuri di straforu,

stampannu figghi, di buttana certu,

divinamenti dopu fatti  santi,

ciumi, muntagni, continenti e stiddi.

Giovi, ch’era lu patri sempiternu,

l’esempiu dava senza rinitenza,

ma non schirzava Veniri e Giunoni

e mancu lu ristanti  patriarcatu.

Teti e Peleu, si vi lu ricurdati,

si maritàru cu na granni festa,

unni si parra di la mela d’oru

e di lu gran burdellu ca nascivu

tra Minerva, Veniri e Giunoni.

Ma non pinsati ca, nasciutu Achilli,

li corna nun ci fici a so’ maritu;

c’  Oceanu si misi e giniravu

nautru figghiu ca lu chiamavu Alfeu.

Essennu chistu picciutteddu schettu,

beddu di facci e di gintili aspettu,

di fimmini la cura ‘un si pigghiava,

ch’era sdunatu di cacciari sempri.

Ed accussì li ninfi senza menu

a Veniri ci dissiru la cosa,

comu qualmenti si pirdeva sbaddu

d’avirì  d’iddu lu piaciri sommu,

ca lu distinu e la natura voli.

Veniri allura taliannu in terra

Vitti d’Alfeu l’immagini pirfetta

c’assicutava aceddi nta lu pratu

tirannu frecci cu l’arcata corda.

Chiamò Cupidu e l’ordini ci detti

di cacciari u cacciaturi, comu

fari sapeva cu’ li frecci soi.

Scinnivu in terra lu sfizziusu  Diu

e quattru frecci  ad iddu ci jttavu,

pirchì ci parsi veramenti moddu.

Mancu s’intisi pérciri la peddi

Alfeu,  ca cu l’arcu tisu arreri curri

a na durata quagghia ca vulava;

l’azzicca cu’ na freccia ed idda squagghia

ed addiventa na pirsuna viva;

lu cacciaturi, ca pirciatu aveva

lu cori di l’amuri, si firmavu

e comu un mammaluccu la vardavu.

Chi natichi, chi minni, chi vuccuzza

e chi capiddi ed occhi ci ammustrava,

ca vidiri ‘un aveva mai pututu.

L’afferra cu li manu e la tastia,

ma chidda s’alluntana e poi ci dici:

“Sugnu Aretusa, ninfa di la caccia,

d’Artemidi figghiozza e virginedda.

Aviri non mi poi, ca sugnu data

a la divina matri ca canusci”.

E mentri chistu dici si cummogghia

Comu cchiù megghiu po’ cu li so manu,

ca nura cumparivu nta na vasca,

tutta d’argentu e d’acqua azzurra china.

Nta l’acqua trasi Alfeu e poi ci dici:

“Bedda Aretusa, ‘un accampari scusi.

Ju ca ti vogghiu e ccà l’arcu abbannunu

e di cacciari cchiù nun mi’interessa.

D’Artemidi non vogghiu nudda grazia,

ca sulu a tia ti vogghiu nto me lettu

e nenti e nuddu mi po’ dari paci

ed astutari stu gran focu vivu

ca tu m’addumi forti nta lu pettu.

Non mi scappari, veni a mia di sutta

e vidi ca chissa ‘un è na cosa brutta.”

Si cummigghiavu tutta l’Aretusa

E a curriri si misi nta lu pratu,

comu l’acqua da vasca ca scappava

e nta lu mari Artemidi prigavu

di tràsiri luntanu di dd’amanti.

Alfeu l’insegui e nun si scanta d’acqua

ed anzi prega la so’ matri Teti

di farlu divintari puru ciumi

cchiù vurticusu d’Aretusa ancora,

ca gà nto mari tumma e si cunfunni.

Alfeu l’acchiappa, ciumi addivintatu,

riccu di fonti  ca ci detti Teti

e  sutta si la metti in sempiternu.

A Siracusa ancora li dui ciumi,

filici sunu di ristari assemi

nto  stissu lettu di tanti anni fa

e a lu divorziu nun pinsàru mai.

ca, sciddicannu assemi nta lu mari,

s’abbrazzanu cu’ l’unni jucarini

.

 

************        

 

Lu mitu di Minossi

 

C’era na vota, si nun lu sapiti,

‘n-anticu regi ca rignava a Crita

ed era assai divotu di li Dei.

Pinsavu ‘n-jornu di sacrificari

a  Giovi Patri  nu voi tuttu sanu

e, siccomu nta stadda nun n’aveva,

dissi a Nettunu siddu, putacasu,

non lu putissi favuriri e fari

nu sbarcu sulu  di dd’armali a Crita.

Cu santa paci ed accuglienza avuta,

vitti Minossi supra di lu mari

‘n-paru di corna di robustu toru,

agghicari natannu nta la ripa.

Quannu tuttu niscivu di lu mari,

      -  Minchia  –  dissi Minossi  –  Quant’è beddu!

Ju chistu nun l’ammazzu nta l’artàru,

cchiù tostu mi lu ‘ncucchiu nta l’aratru!

L’addevu nta la stadda e poi si vidi. -

Cuntentu  a so’ muggheri l’ammustrvu,

ludannu la biddizza di li corna,

lu pilu di la peddi  beddu lisciu

e  la cuda vugghenti  c’ annacava.

Ci  dissi puru ca ci lu mannava

lu Diu Nettunu  pi’ sacrificarlu

supra  l’artàru  di  l’eternu Giovi,

ma già pinsavu d’addivarlu vivu

e poi  vidiri comu accuntintari

lu Patri di li Dei cu’ nautra cosa.

Lu  sintivu accussì parrari a màtula

Nettunu ca nun fu cuntentu e dissi

-Vistu  ca  si’ di corna  piacirusu,

ti fazzu tostu addivintari  beccu! –

- Talia bonu sutta di la panza,

ci dissi a Parsifàni sutta vuci,

vardaci  puru l’attributi duci

c’ammustra st’animali zittu e soru -.

La fimmina lu varda di straforu

e ci dici a Minossi d’addivari

 ‘ssu  toru ca suddisfa puru ad idda.

Passati novi misi, chi successi?

Pi’ vuluntà di Giovi e di Nettunu,

nascivu a la rigina  ‘n-picciriddu,

ca testa avia di toru cu’ li corna,

figghiu direttu di l’amatu voi.

Minossi s’aggattavu , puvureddu,

e senza diri nenti a so’ muggheri,

lu labirìntu fici fari a Crita,

unni ammucciavu li so’ corna e chiddi

di  l’omu ca criscivu menzu toru.

U restu di la storia non vi cuntu,

ca forsi la sapiti, di Teseu

e du ruccheddu di lu filu stisu.

 

**************

 

 

Erculi ed Anteu

 

Cu supra a terra i peri teni fremmi

campa pi’ cent’anni senza peni,

dicevanu l’antichi in sichitanza

e pi’ dari sustanza a sti paroli

lu mitu s’invintaru di la morti

di lu giganti figghiu di Nettunu

e di la Terra ca chiamàru Anteu.

C’era na vota lu giganti Anteu,

patruni e regi di l’antica Sirti,

ca stannu sempri cu’ li pedi in terra,

di morti nun aveva nuddu scantu,

pirchì lu sucu di la vita aveva

sempri di sutta  di so’ matri Gea.

Si mali si sinteva all’impruvvisu

bastava ca tuccassi lu tirrenu

pi’ divintari forti comu prima.

Pi’ chistu  già faceva u priputenti

tagghiannuci la testa comu nenti

a chiddi c’arrivavanu nta Libia.

Vuleva ddocu fari un Partenone

cummigghiatu di testi di murtali

pi’ dari lustru a lu Diu Nettunu.

Quannu agghicari  vitti la pirsuna

d’Ercoli  nta la terra ch’era sua,

-Chi bella testa – dissi  prontamenti.

Cunveni ca la taggghiu prestu prestu

prima ca si la squada e si ni scappa.

-Veni ccà, puddastruni beddu –dissi-

ca la lu coddu ti tiru in tempu nenti

e la testa  la mettu  comu tettu

supra la casa di lu Diu Nettunu –

-… e pigghiatilla, si ni si’ capaci! -

ci arrispunnivu d’Erculi la vuci.

Fu d’accussì c’accuminciò la lotta

tra  lu figghiu di Giovi e lu giganti.

Ci fòru di papagni ‘na passata

e  dopu tra li vrazza lu stringivu

l’eroi a ddu mostru ca s’arrimuddavu;

ma quannu quasi mortu lu lassavu

cascari in terra comu un saccu i favi,

lu vitti ripigghiari novu ciatu.

Tri voti l’acchiappavu ed ogni vota,

ca cu’ li pedi in terra si mitteva

Anteu la forza ripigghiava in chinu,

pirchì la matri Terra lu ‘nfurzava.

Cu’ na vintata Giovi nta  ‘n-aricchia

ad Erculi ci dissi di  lassari

c’Anteu murissi prima tra li vrazza

e d’appuggiarlu in terra dopu mortu,

pirchì la Matri nun avia putiri

di ripurtarlu arreri di l’infernu,

unni cu’ trasi cchiù non nesci fora.

Persi accussì la vita lu giganti

ed Erculi turnavu vincituri

di cu’ la testa tagghia pi’ lu vantu

di na divinitati di ddi tempi.

Qualcunu ancora, ca si cridi Anteu,

tagghia li testi di la genti bona

ma nun ci pensa ca accussì facennu

c’è cu’ la terra sutta di li peri

ci la leva pi’ sempri cu’ li bummi.

 

 

**************