Le poesie di Pippo Nasca

 

 

                       A LEOPARDI

 

   Di tia leggiu lu chiantu,

o Giacuminu lastimusu e tetru,

c'a ciumara virsasti 'nta la carta

e cu' la menti abbolu

unni campasti malatizzu e sulu,

e stancu ti rividu

arriminari libri

oppuru fissu scunfinari in celu

cu' l'occhi lacrimusi.

Ti sentu, jmmurutu ed arracchiatu,

parrari cu' la luna,

assicutari aceddi cu' la menti,

ca nenti sannu 'i tia

e di lu to frastornu

ed a Silvia incucchiari

cosi, ca forsi 'un ascutavu mai

'nta so' curta vita,

ed a muntagni e sepi

cantari l'infinitu cu' duluri.

Capisciu l'amarizza di lu cori

e lu pirchì di 'n-chiantu smudiratu;

ca vecchiu ti sintisti

malatu e malufattu

e la spiranza chiù in terra 'un avisti

di gioia né d'amuri.

 

  A mia non fu natura pricchia e tinta,

c'anzi d'aspettu bonu mi dutavu,

né d'amurusu ciatu

lu focu mi mancavu

e canti spinsirati a voti strogghiu

supra la vita ca nun pari tinta

e ridu e m'addivertu

e, carusazzu, sfasciu cantuneri

o dugnu focu arcanu

a li pinseri amari

e godu di strafari

e tingiu sempri

di culuri rosa

lu nivuru chiù nivuru ca c'é.

Ma certi voti cumpari lu chiantu

'nta l'occhi trimulanti

e l'anima mi sentu scunsulata

e sulu m'arritrovu

'nto mari timpistusu

e dispiratu curru comu pazzu

pi strati sfasciatizzi e senza sboccu,

senza veru mutivu di frastornu.

Lu cori mi s'agghiaccia 'nta lu pettu

e vulissi di mia

cancillari e nomu e vita

ca m'arritrovu scunchiuruta e leggia.

 

   O Giacuminu. forsi ci hai ragiuni!

'Un é curpa di lu jmmu lu to chiantu

e forsi é veru, santamenti veru,

ca 'un c'é filicitati

pi cu' nascivu e campa 'nta stu munnu!

 

 

 

              Lu tracoddu di la luna

 

    Comu 'nto celu piddicusu e mutu,

supra campagni ed acqui,

ca vinticeddu movi ed arrisciala

e milli furmi stagghia,

sempri cangianti e novi

di nivuru cunfusi

e trafuranti luci,

tra casi e rami, tra muntagni e ciumi,

supra li fogghi d'acquazzina intrisi,

c'argentu pari arraccamatu e lustru,

la luna all'orizzonti estremu agghica

e, dopu, tumma 'nta lu mari scuru

o d'arreri a li munti dispittusa

scumpari cancillannu

mari,muntagni e celu,

e la notti di nivuru s'ammanta

e di silenziu eternu,

mentri 'nta l'aria acchiana

lu scunsulatu chiantu di la cucca

e di lu carritteri,

ca salutari voli

la sfujuta lumera di la notti;

   d'accussì squagghia e lassa

la picciuttanza l'omu,

facennu sicchi la menti e lu cori.

Cuntornu perdi la pussanza e l'oru

d'assai spirati cosi

e muta resta, abbannunata e scura,

la vita senza scopu,

pirchì scumpari la spiranza avuta

e la vita già persi ca luceva

e, quannu attornu l'occhi movi e guarda,

insanu trova lu tirari avanti

e scanusciutu pari a la so vista

lu munnu ch'era notu e forsi beddu.

    Troppu duci ci parsi a lu Signuri

la nostra tinta sorti,

si durari puteva

quantu la vita dura

la picciuttanza, ch'é macari fruttu

di milli peni amari e senza funnu!

Troppu beddu ci parsi a lu distinu

sanciri liggi ch'é murtali all'omu,

senza assignari prima

'na pirniciusa pena

assai chiù dura di la stissa morti!

'Nvintari non puteva lu Signuri,

veru mudellu d'immurtali menti,

pinitenza chiù granni

di la vicchiania, fatta

di vogghi antichi, sempri chiù pungenti,

mentri svanisci la spiranza avuta

ed acqua chiù non duna la funtana

p'astutari lu focu mai sbraciatu.

   Prestu l'argentu straburutu in celu,   

ca si curcò la luna 'nta lu mari,

cu' l'oru si cunfunni di lu suli,

ca spunta all'orrizzonti risulenti

e l'arvuli e li casi,

li ciumi e li muntagni,

li tetti e li straduzzi

si vestunu di luci;

lu munnu tuttu paru s'acculura

e cantanu l'aceddi novu coru,

mentri turrenti d'accicanti lampa

rusbigghia la natura

e rinasci la forza e la spiranza

e ritorna la vita

a pariri chiù duci.

Ma chiù non torna a splenniri di luci,

né di culuri chiù

si tingi lu passatu di la vita,

pirchì la picciuttanza non ritorna

e lu scuru di l'anni ca passaru

nun lu cancella mancu lu Signuri,

ma sulu e sulamenti

lu friddu di la morti!

 

 

 

              La quieti  dopu la timpesta

 

     Finivu 'u malutempu:

sentu 'nta l'aria aceddi ciciuliari

e la jaddina arreri carcariari

'nta lu curtighiu ancora bagnatizzu.

A punenti si stagghia lu bontempu,

si scucuzza lu munti di la negghia,

lu chianu si rischiara

e lu ciumi si vidi cilistrinu

scasari allegramenti 'nto vadduni.

Li cori sunu in festa

e d'ogni banna allegru ricumincia

lu rumurusu coru d'ogni jornu.

Supra la porta torna lu scarparu

a chiantiddari furmi e lu firraru

lu ferru astuta, ribattutu prima,

'nta l'acqua di lu catu,

mentri lu virduraru

ricumincia a vanniari 'nta la strada

e, ciavuliannu a gara,

li fimmini arricogghiumu 'nte sicchi

l'acqua ca scinni ancora di li tetti.

E vuci e canti e corpa di marteddu

si levanu 'nto celu,

mentri lu suli tuttu allucia e ridi

supra muntagni e tetti.

Si grapunu finestri e purticati

e scrusciu si risenti 'nta li stradi

di traballanti carri

e sonu di tistali,

ca ripigghiò la strada 'u carritteri.

   Sunu in festa li cori!

Quann'é chiù duci 'a vita

di stu mumentu arcanu,

ch'é privu di turmentu

pi li passati lazza?

Chi c'é chiù beddu e duci

di riturnari a fari cu' piaciri

li cosi fatti prima

oppuru novi e grati

e nun si ricurdari

di li passati peni?

E' figghiu di l'affannu lu piaciri!

La vera cuntintizza

é fruttu di lu scantu di muriri,

puru pi chiddu ca la morti cerca.

E lu scantazzu di ristari friddi

'nto menzu di li lampi e di li trona

ora scumpari, ca la genti godi

pi lu passatu dogghiu.

     O tu, tinta natura,

ca d'ogni mali si’ la vera fonti

ed all'umanu statu nun cuncedi

ca dulurusi trazzi

e surdidi malanni

pi 'n-sulu fattu si’ curtisi e cara,

ca tu cunsenti almenu certi voti

filicitati all'omu,

ca cunsisti 'nto sulu ricurdari

lu passatu mumentu di lu scantu
e la scampata pena

pirchì filicitati é sulu fruttu

di mumintania stasi di la pena

e lu piaciri nasci

e veni fora a casu

da pricidenti affannu.

Lu nesciri di pena é vera gioia,

ca dura quantu dura 'ssa nisciuta,

pirchì la vita é china di duluri,

ca spunta ad ogni istanti

e morti, ca la tagghia 'nsemi ad iddu,

all'omu eterna duna

filicitati granni e senza fini.

 

 

 

            A Silvia

 

 

   Cu' si po chiù mai di Silvia scurdari

e di lu tempu quannu,

all'alba di la vita s'affacciava

e 'nta l'occhi mustrava

tuttu l'amuri e li pinseri strani

di cu' nun havi pinni pi vulari!

   Comu rintoccu di campani a festa

'nta l'aria si spannia,

spinsiratu cantu d'acidduzzu,

la so vucidda tra li cheti stanzi,

mentri allegra facia

li soliti cusuzzi di la casa.

Era lu tempu di li rosi in ciuri

e cu ducizza pinsava all'amuri!

   Nun haiu lingua sciota

e mancu versi arcani

pi diri chi pruvava 'nta lu pettu

quannu ascutava lu so duci cantu

e sintia lu so lestu piditozzu.

mentri incurvatu supra

li travagghiati carti

liggeva in sichitanza,

spricannu da me vita la chiù parti.

   Jù tuccava lu celu cu li manu

e sprufunnava 'nta lu mari azzurru

e mi pirdia 'ntra l'immensi munti,

si m'affacciava di la porta antica

e la videva trammistiari allegra

comu un'apuzza c'a ciuri si frica.

Era cuntentu pi la grandi gioia

ca mi dvanu li spiranzi arcani

di li jorna a viniri,

sempri chiù beddi, sempri chiù filici,

pirchì granniusu e beddu

mi pareva tannu l'umanu statu

e lu prisenti fatu.

    Quannu pensu a sti passati cosi

ed all'attuali vita li cunfrontu,

lacrimi chiangiu amari

e mi pigghia lu scunfortu.

Maliditta natura,

pirchì tantu prumetti a li to figghi

e, poi, senza pietati, a cu' t'ascuta

mutuperii duni a centu a centu,

mentri fidi e spiranzi

si vannu sbraciannu

comu tizzuna lassati a lu ventu?

    Ancora prima ca finissi l'annu,

comu lu ciuri, ca lentu s'ammuscia

pi la mancanza d'acqua

sutta lu raggiu di cucenti suli,

accussì la mischina,

di cancuru cunsunta,

supra la pettu la testa reclina

e senza scampu la morti l'ammanta.

Lassa la vita e l'amurusu affannu

e perdi, prima di tastarla ancora,

la duci etati di la gioventù,

senza gudiri di la so biddizza,

c'allampa comu rosa ca non sboccia.

   Pi mia macari tutta

la spiranza ca in pettu tinia

prestu finiu: spirdutu

'nta stu munnazzu chinu di duluri,

vecchiu mi fici prima di lu tempu,

senza l'amuri, senza

l'affettu di la me cumpagna amata,

chinu d'acri ricordi e d'insulenza.

Chistu é ddu munnu beddu

ca spirai cu tantu arduri?

Chisti su’ li gioi, chista

é la risulta di lu nosru amuri?

chista é la sorti di l'umana genti,

ca mori senza scampu

e di la vita nun lassa chiù nenti?

Megghiu a stu munnu 'un nasciri pi nenti!

 

 

 

            L'infinitu 

 

    Sempri bedda m'appari sta muntagna

e sta intrigata sepi di ruvetti,

c'ammuccia quasi tuttu all'orizzonti.

Quannu assittatu 'ntrinsicu la guardu,

mi pari di scupriri 'n-autru munnu,

ca si spanni d'arreri senza fini,

di paci fattu e di silenziu eternu

e senza ca lu cori s'abbarrua.

Sentu 'u ventu ca chiangi tra li spini

e stu gran chiantu all'infinita paci

vaiu cunfruntannu, e la morti a la vita,

e lu prisenti a lu passatu tempu,

e m'arricordu di l'eternu Amuri.

Comu é beddu vulari 'nta st'immensa

ducizza di pinseri arcani, mentri

tra stiddi nuvuli e spiranzi novi

la menti curri senza frenu e scantu!

 

 

 

            A la luna

 

   Ti vardu, o duci luna, e m'arricordu

ca l'annu scorsu supra sta muntagna

adduluratu ti vinni a taliari

e tu pinnevi supra 'a stissa siepi,

c'allumini di luci tutta para.

Ma la to facci infrusculiata parsi

a la me vista pi lu chiantu 'ncuttu

ca mi spuntava supra l'occhi, o luna,

pirchì dannatu mi sinteva e sugnu,

ca la me vita é tinta e 'un cangia stili.

Ora m'aggiuva ricurdari in siccu

lu tempu ca passavu malamenti

e puru siddu dura lu duluri

ca l'arma mi scicavu a morsu a morsu,

sentu ch'é duci e beddu ripinsari

a cosi ca passaru tempu arreri,

pirchì lu corsu da memoria é curtu

e chiddu da spiranza assai chiù longu

quannu la picciuttanza ancora luci.

 

 

         Lu sabbutu ‘nto villaggiu

 

   Lu suli va calannu.

la viddanedda veni da campagna,

purtannu in testa 'n-fasciu d'erba frisca

e ciuri tra li manu,

ca dumani, duminica, si voli

lu pettu e li capiddi inghirlandari

di rosi russi e violi,

comu di festa sempri fari soli.

Lu cori ci scattia 'nta lu pettu

pirchì la menti vola cu piaciri

supra lu jornu c'arrivavu infini.

   S'assetta 'nto pisolu

assemi a la vicina 'a vicchiaredda

e mentri parra fila,

quannu lu jornu si perdi all'orizzonti.

Gira sfurzata la cunocchia tunna,

lu ghiommiru si vunchia ed idda cunta;

cunta li cosi di quann'era nica

e poi picciotta schetta,

quannu 'a faretta nova s'incignava

lu jornu di la festa

e poi di sira senza nuddu affannu

a ballari curreva cu l'amici

e masculi ci avia sempri d'attornu,

ca, tannu, facci liscia

e sapuritu aspettu

rigina la facevanu da festa.

Vidi 'nta chiazza 'n-crocchiu di carusi

jucari a brighia sciota

e stancu ma cuntentu 'u zappaturi

a casa riturnari mentri frisca,

pirchì dumani infini

la zappa nun ripigghia e s'arriposa.

   L'aceddu chiù nun canta,

li stradi sunu leggi e tuttu é paci;

sulu 'nto celu tremanu li stiddi

e la luna 'un si stanca di vardari.

Ma 'nto silenziu ascuti

lu lagnu di la serra ca travagghia,

lu chianozzu stricari cu' lu lignu

e lu marteddu ribbummari in chinu

supra lu ferru ribattutu a tonu,

ca l'ultimu ritoccu

duna lu mastru attentu

all'opira chiummuta,

pirchì dumani é festa e la cunsigna.

Su' l'ultimi rumuri da jurnata,

é l'ultima canzuna

di 'na simana sana

passata travagghiannu senza posa,

é l'ultimu lamentu da spiranza,

c'astuta tempu travagghiatu e tintu.

     Dumani é festa granni,

di setti jorna lu chiù duci e bonu,

e la spiranza torna 'nta lu cori,

pirchì finisci almenu 'n-sulu jornu

di turmintari l'arma lu distinu,

finisci pì tanticchia

lu solitu frastornu,

lu solitu calari la carina,

lu solitu assuppari lu vilenu

da vita ca tracodda sempri 'a stissa.

Dopu la festa passa la spiranza

e torna lu sconfortu:

la viddanedda torna a la campagna,

la vecchia torna a ripinsari a morti,

lu zappaturi torna a travagghiari

e chiù nun frisca allegru

e mancu li carusi fannu crocchiu,

assittati 'nte banchi di la scola,

mentri frastornu rumurusu torna

a turmintari stradi, casi e cori.

    O picciutteddu allegru,

lu to curtu ciuriri

é comu un jornu chinu di piaciri,

ma, ricorda, ch'é sulamenti un jornu,

'na sula curta sosta,

pi poi tummari 'nta l'infernu in chinu!

Godi quantu sai e puoi,

ca lu mumentu é giustu

e st'anni ca tu passi nun li trovi.

Ascuta a cu' ti parra, 'un aspittari,

pirchì dumani é tardu, troppu tardu!

 

 

 

          Cantu notturnu di 'n-pasturi di l'Asia

 

    Chi fai tu luna in celu?

ddocu, dimmi, chi fai?

Ti susi 'a sira e vai

muta vardannu attornu e poi ti fremmi.

Nun t'ha stancatu ancora

di fari sempri 'a stissa eterna strada?

Nun t'ha stuffatu ancora

vardari 'i stissi cosi?

Lu to campari é tali e quali a chiddu

du picuraru erranti.

Si susi 'i bon matinu,

ammutta co' vastuni

li pecuri lagnusi p'a campagna,

camina in sichitanza,

vidi trazzeri e ciumi,

muntagni e poi vadduni

e quann'é sira arresta lu so passu

e s'arriposa supra l'erba virdi

e nenti vola e spera.

Dimmi chi cunta, o luna,

sta vita o' picuraru?

e la to stissa vita chi ti vali?

Chi cunta 'u picuraru e puru tu?

Dimmi qual'é lu sensu

di la  me curta vita senza scopu

e di lu to vagari senza fini?

     O luna immaculata,

tu vardi ma non sai

ca la vita murtali

é comu un vecchiu stancu e malatizzu,

menzu vistutu e scausu,

ca porta 'nta li spaddi un fasciu 'i ligna,

pisanti chiù du giustu,

ca, zoppu, si strascina a malapena

pi stradi muntagnusi,

chini di petri e spini,

sutta cucenti suli

e in menzu a gelu funnu,

quannu lu tempu é beddu e quann'é tintu.

Iddu cammina, arranca,

attruppicannu casca e poi si susi

e, tuttu insanguniatu,

spingi lu passu senza ripusari

attravirsannu ciumi spavintusi

e sepi di ruvettu

e tira sempri avanti

finu a quannu arriva dispizziatu,

scicatu e chinu 'i chiai,

in pizzu a lu sdirrubu ca l'aspetta

e si l'agghiutti sanu scancillannu

peni, malanni e vita.

     Nasci suffrennu l'omu

e la nasciuta stissa, tanti voti,

é la causa da' morti.

L'omu ca nasci chiangi pi duluri

e patri e matri dunanu cunfortu

pi la svintura granni

c'ad iddu ci tuccavu

'nta lu mumentu giustu

ca la mammana 'i peri ci tiravu.

L'annacu di la matri 'o picciriddu

é pirchì lu cunsola ca nascivu.

Ma, si natura voli

stu cunsulari dopu,

pirchì cunsenti la nasciuta allura?

Chi sensu ci havi dari

la svintura e cunsulari dopu?

Chistu é lu statu di cu' nasci e mori

o luna janca e pura,

ma tu non mori e forsi ti ni futti

di 'n-zoccu dicu o forsi nun capisci.

    O forsi, eterna e muta vagabunna

di l'infinitu celu, mi capisci

e sai lu sensu di la nostra vita,

lu dolu ca lu cori m'attanagghia

e stu cascari, stu mumentu estremu,

stu divintari 'giarnu,

st'abbannunari affetti e cumpagnii,

stu scumpariri in siccu 'nta lu munnu,

unni 'un esisti nenti.

Tu certamenti sai

lu pirchì e lu pircomu d'ogni cosa,

lu scopu di la sira e da matina

e du' tempu la cursa dissinnata.

Tu certamenti sai

da primavera e di l'invernu lu misteru,

a cu' servi st'arduri ca m'abbrucia

la menti e li pinseri

e stu friddusu ciatu

ca m'agghiaccia lu cori.

Su' chiù di milli 'i cosi ca canusci,

ca nun li sapi 'u picuraru erranti.

Quannu ti vidu stari

accussì muta in celu,

vardari in terra spinsirata e sula,

oppuru attornu a stralucenti stiddi

assicutari incutta l'anni mei,

ju m'addumannu e pensu:

pirchì tanti faiddi?

a cosa servi st'infinitu celu?

e stu tempu serenu?

e stu silenziu eternu?

ed iu cu' sugnu? pirchì campu infini?

Pensu e ripensu dintra mia sti cosi

e 'nta la menti pigghia giusta furma

l'universu infinitu

e vidu in terra l'omini passari

e vidu immensa brulicari in celu,

superba, la famigghia di li stiddi

e l'eternu furriari

d'ognu celesti cosa,

lu so turnari a tonu 'o stissu puntu,

e nun capisciu 'u scopu

di st'ordini suvranu.

Ma sugnu chiù ca certu, o luna mia,

ca lu fini canusci

di tuttu stu girari e da me vita

e forsi puru sai

di sta me vita amara

cu' n'havi giuvamentu ammeri ddocu 

    O pecuri filici e scansunati,

ca supra l'erba stravaccati stati

e nun capiti,cridu,la miseria

unni pasciti muti.

Sugnu invidiusu di lu vostru statu

pirchì 'un aviti peni

e vi scurdati sempri di li stenti

e, supratuttu, scanusciti ancora

la noia di campari.

Ora ca v'aggiuccati supra l'erba,

siti cuntenti e saggi

e 'un vi stancati di passari 'a vita

'nta sta manera queta.

Ju puru mi stravaccu supra l'erba,

ma sentu la frastornu ca mi pigghia

e pungiri accumincianu li spini

du solitu siddiu e di la noia.

Eppuru 'un vogghiu nenti e nenti speru

e 'un m'ha successu nenti

ca mutivassi lu me chiantu amaru.

Nun sacciu chi vi fa filici,amici,

e quantu di piaciri vi pasciti,

ma siti furtunati

e di stu fattu sugnu assai cuntentu.

Ma chiù lu fussi si capissi chistu:

pirchì m'annoiu quannu m'arriposu,

mentri 'nto munnu godunu l'armali

si 'nta l'aggiuccu stannu a 'un fari nenti?

    Ah, si putissi in celu svulazzari

e di sta terra spiccicari 'i peri

ed acchianari tostu

de' nuvuli a cavaddu

e li stiddi cuntari ad una ad una

e comu 'n-lampu tronu scurazzari

tra li pizzuti munti

pi 'nu mumentu sulu,

fussi filici, o picureddi mei,

e chiù nun m'annuiassi, o janca luna.

Ma forsi sbagghiu tuttu

e malamenti pensu

supra la vera sorti di l'armali.

Forsi 'un esisti un jornu ch'é filici

pi nuddu 'nta stu munnu

sia ca 'nto lettu nasci ca 'nta stadda.

 

 

 

         Lu passuru solitariu

 

 

    D'in pizzu 'o vecchiu campanaru tummi

cu' l'ali aperti supra la campagna,

o passareddu senza cumpagnia.

Sulu suliddu abboli senza abbentu,

di quannu spunta 'u suli a quannu mori

e lu to cantu spanni spasulatu

'nto celu ch'é fistanti e trinchillanti.

Tu vidi in coppia stari l'autri aceddi,

ca cantanu filici e spinsirati

addisignannu in celu milli jochi

e supra 'a terra, ancora, l'autri armali

scangiarisi cuntenti li paroli

e farisi carizzi comu pazzi.

Linchi lu cori a tutti 'a primavera

e l'ummira nun c'é di malutempu.

Su' tutti li stinnicchi accuntintati

di lu chiù beddu tempu ca riluci.

Tu di luntanu vardi tuttu quantu

e sulitariu resti 'nta lu celu,

scanzannu jochi, spassu e passatempu.

Pì tia nun c'é dilettu e cumpagnia,

ma sulu volu e cantu 'nta to vita,

ca scurri sempri 'a stissa e senza sconzu.

Lu to passari malamenti l'anni,

mi pari tali e quali la me vita,

ca sugnu comu a tia sfasatu e sulu.

D'unni mi votu e giru, d'ogni latu,

vidu la genti 'nsemi allegra stari,

gudirisi la vita, sciampagnari

e cilibrari amuri spinsiratu

e di luntanu vardu insalanutu

e sulu strogghiu versi a cu 'un ascuta,

pirchì mi manca lu curaggiu infini

di viviri filici tra la genti.

Ascutu di luntanu lu vuciari,

lu sonu di la banna ca si sperdi,

lu bottu du murtaru ca rintrona

e vidu in massa sparpagghiati in celu

milli faiddi acculurati a rota.

Mentri la festa impazza 'nta li stradi

e lu rumuri ribummannu in celu

si perdi tra li munti e li vadduni

e tocca sempri novi casi e cori,

ju restu arrassu 'nta me vecchia casa

e sulu comu un mammaluccu vidu,

ascutu, chiangiu e dispiratu scrivu

e l'anima mi pasciu di duluri.

O passareddu nicu, amicu e frati,

quannu la sira scinni supra 'a terra,

finisci di vulari e stancu e mutu

t'aggiucchi 'nta lu nidu e si cuntentu

du jornu ca passasti tuttu sulu,

pirchì di lu distinu t'accuntenti,

ca ti vosi natura stampigghiari.

Ma quannu scinni supra mia la sira

du jornu ca passavu, mi disperu

e sentu ca chiù forti lu duluri

m'attanagghia lu cori turmintatu,

c'alla stanchizza impiccicata vidu

la raggia di 'un aviri arricugghiutu

lu megghiu fruttu di lu me campari

e morta vidu la spiranza persa

d'aviri amuri, cuntintizza e paci,

ca lu distinu mi cunnanna a vita

ad essiri infilici.

 

 

 

                Li ricurdanzi

 

 

   Mirabulanti stiddi di la notti,

ju non pinsava di turnari ancora

ad ammirarvi scintillanti in celu

ed ascutari li paroli muti

ca lu me cori vi mannava duci,

mentri assittatu mi ni stava soru

arreri a la finestra di sta casa,

ca nasciri mi vitti e poi muriri

di peni e di spiranzi mai chiummuti.

Di sutta a la prunesta quanti voti,

gurdannu in celu ed ascutannu 'ncuttu

la gracidanti vuci di la rana,

di milli e passa luci v'adurnai

e di spiranzi tutti v'inundai!

E mentri lu pinseri a vui vulava,

li puddiri ballavanu d'attornu,

lu celu villutatu di serenu

di ciavuru e rumuri si lincheva

e l'ecu farfagghianti di la genti

luntanu si spirdeva spinsiratu.

Chi pinseri, chi cori e quantu amuri

m'addumaru la menti a lu gurdari

stu mari azzurru e sti muntagni tannu,

quannu pinsava di passarli 'n-jornu,

quasi cunvintu di luntani gioi,

ca fingiri vuleva d'affirrari,

e nun sapeva lu distinu amaru

ca m'aspittava sempri piddicusu,

finu a lu puntu di vuliri morti.

    Ju nun pinsava ca la virdi etati

passari la putissi cunnannatu

a cunsumarla comu na cannila

'nta stu paisi malidittu e rozzu,

unni nascivu pi disgrazia mia

ed unni genti zotica e viddana,

ca porta nomi strani e scunchiuruti,

mi sparra e mi dileggia senza mancu

sapiri 'n-soccu pensu, 'n-soccu vogghiu,

chiddu ca lu me cori spera; eppuru

a nuddu dugnu 'mmestu, a nuddu parru

e mancu mi cunsola la vintura

ca troppu stima mi procura dannu

in menzu a sta genti sulu dispittusa.

Cca l'anni passu di la megghiu vita,

abbannunatu, sulu e scanusciutu,

senza amurusi spinni e senza vita,

arraggiatizzu a forza contru tutti,

cani rugnusu 'nta lu bagghiu,

dunni scantatu si furria d'attornu

tra pecuri sfuggenti e trapuleri.

Cca di pietà mi spogghiu e di valuri

e sempri chiù mi pasciu di disprezzu

pi tuttu chiddu ca mi sta d'attornu,

mentri mi sghidda sutta l'occhi mesti

lu tempu caru di la picciuttanza,

chiù bedda di la fama e di l'alloru,

chiù duci di la luci di lu jornu.

Ed accussì ti perdu vanamenti

senza dilettu, scanzunatu ciuri

di la chiù bedda etati, insalanutu

'nta sta speci d'infernu apparicchiatu!

     Porta lu ventu mestu lu rintoccu,

sempri lu stissu di lu vecchiu roggiu

ca in cima sona di lu campanaru.

Ju mi ricordu quannu picciriddu

'ssu rintuccari a tempu 'nta la notti

lu cori mi lincheva, ch'era persu

arreri lu jucari di la menti

tra friddusi mura di la stanza.

Cca, tuttu m'arricorda lu passatu:

lu cantu di l'aceddi, lu truzzari

di li fogghi annacati di lu ventu,

lu bottu di lu tronu e lu scasari

di l'assulatu jornu 'nta campagna.

Dall'arcu di sta porta lu me sguardu

luntanu si pirdeva all'orizzonti,

fantasimi pittannu 'nta stu celu

e spimmuli azziccannu fatti d'oru

'nta l'argentu lunari e di li stiddi.

Farfalli assicutava cu la menti

e svulazzava comu taddarita

allegramenti e nun gurdava attornu

lu scurriri mulestu di la vita.

Ju non capeva ca la megghiu vita

pi mia passava senza lu piaciri

di viviri filici e ca scappava

lu tempu di gudiri, supra l'ali

sciarrusi e vani di la fantasia.

Qunn'é carusu l'omu s'accuntenta

di poca cosa, anzi di nenti e nenti

ad iddu assortu ci cumpari beddu:

lu tramuntanti suli, la campagna,

lu mari e li muntagni, li ciumi,

li stiddi e lu cantari di l'aceddi,

pirchì nun sapi lu viraci sensu

di la vita e scanusci lu futuru.

Accussì campa ammunziddannu sonni

e morti ancora vivu lu sutterra.

     O spiranzi, spiranzi, amari spirdi

di la me prima etati, ca riturnati

sempri a surcari la me menti svigghia,

ju non vi scordu e vi rincurru a tappu,

pirchì sempri lu stissu é lu me scopu:

assicutari sonnira d'amuri

e tremuli fantasmi di grannizza;

ma lu spirari é vanu, ca dilettu

non trovu e mancu paci e propriu nenti

cangia tra tannu ed ora: la miseria

resta l'amaru fruttu di 'na vita

passata arreri a sonnira scunchiusi

e la filicitati è ‘na chimera.

Nenti mi desi lu spirari tantu,

ca lu distinu miu fu di suffriri

ed ora sugnu dispiratu e sulu,

pirchì fineru li spiranzi puru;

ma certi voti a vui ripensu antichi

farfagghiamenti di lu me pinseri

e dicu ch'era beddu almenu aviri

lu vostru cunfurtari li me jorna,

pirchì senza di vui mi resta sulu

spiranza di muriri e dari fini

a stu campari vili e senza semsu.

Puru si l'invucata morti agghica

a dari fini a stu distinu amaru,

quannu pirdutu 'nta lu catalettu

l'occhi pi sempri chiudu e chiù non speru,

'nta ddu mumentu certu a vui ripensu

e lu duluri sentu di pruvari

assai chiù forti pi li jorna persi

e la ducizza di muriri infini

sarà turbata di stu novu affannu.

     E già la morti cuminciai a chiamari,

quannu a spirari e chiangiri partivu

all'alba di la vita giuvanili!

Quanti voti guardannu lu currenti

ciumi, assittatu supra di la riva,

pinsai 'nta l'acqua d'astutari in siccu

spiranzi e vita, chinu di scunfortu!!

Ma pi disgrazia in forsi m'arristai

a chiangiri li jorna di la gioia

ed ammusciari vitti senza scampu

lu ciuri beddu di la picciuttanza

senza sapiri né pirchì né pircomu,

tantu duluri mi cascava in coddu. 

Allura notti pinsirusi e svigghi

passava 'nta lu lettu spiranzusu,

ma rincurrennu fantasiusi spirdi

videva l'anni scurriri pirduti

e supra mia struggheva inni di morti.

     Non po non chiangiri lu cori ancora

'nta lu pinsari all'anni spiranzusi,

quannu la prima etati s'apprisenta,

ricca d'amuri e fimmini d'attornu,

quannu lu cori scassa pi la gioia

ed ogni cosa pari bedda e duci;

lu munnu attornu ridi e sintimentu

non nasci 'nta lu cori di spaventu:

nenti matruni e vogghia di muriri,

nenti scantazzu di ristari sulu

o di sbagghiari, ca di 'n-soccu dici

e fai nuddu ti dici ch'é sballatu,

anzi lu sbagghiu simpatia ti duna

e masculu ti faci di sustanza;

ognunu risulenti ti s'ammustra

e binidici l'anni to futuri.

Ma duranu lu tempu di lu tronu

li jorna duci di la gioventuti

e di svintura sulamenti resta

l'orrendu stampu a cu' vecchiu diventa.

Chi vali lu campari siddu ammuscia

pi sempri lu ciurutu stelu amatu

di lu tempu c'a matula passavu!?

     Di tia, Nerina, sula ricurdanza

mi resta, 'nta stu postu, ch'era duci! 

Cca ti vitti ciuriri comu un gigliu

e risulenti accarizzari l'uri

di lu chiù beddu tempu: non ti scordu!

Unni si juta, amuri miu pirdutu,

ca chiù non s'apri dda finestra antica,

fonti di luci e di spiranza vana?

Unni fineru dd'occhi e ddi capiddi

e dda vuccuzza di rusatu risu?

Ormai non sentu la to vuci amica

tra l'arvuli ciuruti di lu campu

e nun ascutu assortu lu to cantu,

ca morti ti intuppavu vucca e vita.

Quanti pinseri e sfavillanti stiddi

e favulusi munni e janchi cimi

la menti ti lincheru di puisia

ed a mia 'nta lu pettu lu curuzzu

mi ficiru spirari la grannizza!

Ora 'nto celu acchiana spavintusa

la to mancanza e lu me chiantu vanu.

Passasti comu ventu pillirinu

ca 'nfurzannu cancella la spiranza,

ma vivu e forti lassa lu ricordu;

passasti comu sonniru pirdutu,

comu stidda filanti all'orizzonti,

comu faidda di murenti focu!

Ed ora, tu Nerina, lu ricordu

lu chiù pimpanti resti di sta vita,

ca m'assignò distinu maliditta.